ตตฺรายํ สงฺเขปตฺโถ โภ พฺราหฺมณ มกฺกโฏ กตคุณชานนโก อาจารสมฺปนฺโน สีลวา อตฺถีติ กหํ ตยา สุโต วา ทิฏฺโฐ วา, อิทานิ โข อหนฺตํ โอหจฺจํ วจฺจํ เต สีเส กตฺวา ปกฺกมิสฺสามิ ฯ อมฺหากํ หิ มกฺกฏานํ นาม เอสา ธมฺมตา อยํ ชาติสภาโว ยทิทํ อุปการกสฺส สีเส วจฺจํ กาตพฺพนฺติ ฯ

ตํ สุตฺวา โพธิสตฺโต อุฏฺฐาย คนฺตุํ อารภิ ฯ มกฺกโฏ ตํ ขณญฺเญว อุปฺปติตฺวา สาขาย นิสีทิตฺวา โอลมฺพกํ โอตาเรนฺโต วิย ตสฺส สีเส วจฺจํ ปาเตตฺวา วิรวนฺโต วนสณฺฑํ ปาวิสิ ฯ โพธิสตฺโต นฺหาตฺวา อคมาสิ ฯ

สตฺถา น ภิกฺขเว อิทาเนว เทวทตฺโต, ปุพฺเพปิ มยา กตคุณํ น ชานาติ เยวาติ อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา มกฺกโฏ เทวทตฺโต อโหสิ, พฺราหฺมโณ ปน อหเมวาติ ฯ

ทุพฺภิยมกฺกฏชาตกํ จตุตฺถํ ฯ