ตตฺถ ธนุหตฺถกลาเปหีติ ธนุกลาปหตฺเถหิ ธนูนิ เจว สรกลาเป จ คเหตฺวา ฐิเตหีติ อตฺโถ ฯ ปริกิณฺณมฺหาติ ปริวาริตมฺหา ฯ กถนฺติ เกน นุ โข อุปาเยน อมฺหากํ โมกฺโข ภวิสฺสตีติ ฯ

เตสํ กถํ สุตฺวา วานรินฺโท มา ภายิตฺถ, มนุสฺสา นาม พหุกิจฺจา, อชฺชาปิ มชฺฌิมยาโม วตฺตติ, อปิ นาม เตสํ อมฺเห มาเรสฺสามาติ ปริวาเรตฺวา ฐิตานํ อิมสฺส กิจฺจสฺส อนฺตรายกรํ อญฺญํ กิจฺจํ อุปฺปชฺเชยฺยาติ วานเร สมสฺสาเสตฺวา ทุติยํ คาถมาห

อปฺเปว พหุกิจฺจานํ อตฺโถ ชาเยถ โกจิ นํ,

อตฺถิ รุกฺขสฺส อจฺฉินฺนํ ขชฺช ตญฺเญว ตินฺทุกนฺติ ฯ