ตตฺถ นนฺติ นิปาตมตฺตํ ฯ อปฺเปว พหุกิจฺจานํ มนุสฺสานํ อญฺโญ โกจิ อตฺโถ อุปฺปชฺเชยฺยาติ อยเมตฺถ อตฺโถ ฯ อตฺถิ รุกฺขสฺส อจฺฉินฺนนฺติ อิมสฺส รุกฺขสฺส ผลานํ อากฑฺฒนปริกฑฺฒนวเสน อจฺฉินฺนพหุการํ อตฺถิ ฯ ขชฺช ตญฺเญว ตินฺทุกนฺติ ตินฺทุกผลํ ขชฺชถ เยว ตุมฺเห, ยาวตเกน โว อตฺโถ อตฺถิ, ตตฺตกํ ขาทถ, อมฺหากํ ปหรณกาเล ชานิสฺสามาติ ฯ

มหาสตฺโต กปิคณํ สมสฺสาเสสิ ฯ เอตฺตกํ หิ อสฺสาสํ อลภมานา สพฺเพปิ เต ผลิเตหิ หทเยหิ ชีวิตกฺขยํ ปาปุเณยฺยุํ ฯ มหาสตฺโต ปน เอวํ วานรคณํ อสฺสาเสตฺวา สพฺเพ วานเร สมาเนถาติ อาห ฯ สมาเนนฺตา ตสฺส ภาคิเนยฺยํ เสนกํ นาม วานรํ อทิสฺวา เสนโก นาคจฺฉตีติ อาโรเจสุํ ฯ สเจ เสนโก นาคโต, ตุมฺเห มา ภายิตฺถ, อิทานิ โว โส โสตฺถึ กริสฺสตีติ ฯ เสนโกปิ วานรคณสฺส อาคมนกาเล นิทฺทายิตฺวา ปจฺฉา ปพุทฺโธ กญฺจิ อทิสฺวา ปทานุปทิโก หุตฺวา อาคจฺฉนฺโต มนุสฺเส ทิสฺวา วานรคณสฺส ภยํ อุปฺปนฺนนฺติ ญตฺวา เอกสฺมึ ปริยนฺตเคเห อคฺคึ ชาเลตฺวา สุตฺตํ กนฺตนฺติยา มหลฺลกิตฺถิยา สนฺติกํ คนฺตฺวา เขตฺตํ คจฺฉนฺโต คามทารโก วิย เอกํ อุมฺมุกํ คเหตฺวา อุปริวาเต ฐตฺวา คามํ ปทีเปติ ฯ มนุสฺสา มกฺกเฏ ฉฑฺเฑตฺวา อคฺคึ นิพฺพาเปตุํ อคมํสุ ฯ วานรา ปลายนฺตา เสนกสฺส อตฺถาย เอเกกํ ผลํ คเหตฺวา ปลายึสุ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา ภาคิเนยฺยเสนโก มหานามสกฺโก อโหสิ, วานรคณา พุทฺธปริสา, วานรินฺโท ปน อหเมวาติ ฯ

ตินฺทุกชาตกํ สตฺตมํ ฯ