ตํ ชนิตํ ภวิตญฺจ ปุริสสฺส ปชานโต

ยหึ ชีเว ตหึ คจฺเฉ, น นิเกตหโต สิยาติ ฯ

๒ ขณนฺโตติปิ ฯ

ตตฺถ ชนิตํ เม ภวิตํ เมติ อิทํ มม ชาตฏฺฐานํ อิทํ วุฑฺฒิตฏฺฐานํ ฯ อิติ ปงฺเก อวสฺสยินฺติ อิมินา การเณน อิมสฺมึ กทฺทเม อวสฺสยึ นิปชฺชึ วาสํ กปฺเปสินฺติ อตฺโถ ฯ อชฺฌภวีติ อภิภวิ วินาสํ ปาเปสิ ฯ ภคฺควาติ กุมฺภการํ อาลปติ, กุมฺภการานํ นามโคตฺตปญฺญตฺติ เอสา ยทิทํ ภคฺควาติ ฯ สุขนฺติ กายิกเจตสิกสฺสาทํ ฯ ตํ ชนิตํ ภวิตญฺจาติ ตํ ชาตฏฺฐานญฺจ วุฑฺฒิตฏฺฐานญฺจ ฯ ชานิตํ ภาวิตนฺติ ทีฆวเสนาปิ ปาโฐ ฯ โส เยว อตฺโถ ฯ ปชานโตติ อตฺถานตฺถํ การณาการณํ ชานนฺตสฺส ฯ น นิเกตหโต สิยาติ นิเกเต อาลยํ กตฺวา อญฺญตฺถ อคจฺฉนฺโต นิเกเตน หโต, เอวรูปํ มรณทุกฺขํ ปาปิโต น ภเวยฺยาติ ฯ