๙ สตธมฺมชาตกํ

ตญฺจ อปฺปญฺจ อุจฺฉิฏฺฐนฺติ อิทํ สตฺถา เชตวเน วิหรนฺโต เอกวีสติวิธํ อเนสนํ อารพฺภ กเถสิ ฯ

เอกสฺมึ หิ กาเล พหู ภิกฺขู เวชฺชกมฺเมน ทูตกมฺเมน ปหิณคมเนน ชงฺฆเปสนิเกน ทนฺตกฏฺฐทาเนน เวฬุทาเนน ปุปฺผทาเนน ผลทาเนน จุณฺณทาเนน ครุภณฺฑทาเนน โอสธทาเนน ปิณฺฑปาติเกนาติ เอวรูปาย เอกวีสติวิธาย อเนสนาย ชีวิตํ กปฺเปสุํ ฯ สา สาเกตชาตเก อาวิภวิสฺสติ ฯ สตฺถา เตสํ ชีวิตกปฺปนภาวํ ญตฺวา เอตรหิ พหู ภิกฺขู

อเนสนาย ชีวิตํ กปฺเปนฺติ, เต ปน เอวํ ชีวตํ กปฺเปตฺวา ยกฺขตฺตภาวา เปตตฺตภาวา น มุจฺจิสฺสนฺติ, ธุรโคณา วา หุตฺวา นิพฺพตฺติสฺสนฺติ, นิรเย จ ปฏิสนฺธึ คณฺหิสฺสนฺติ, เอเตสํ หิตตฺถาย สุขตฺถาย มยา อตฺตชฺฌาสยํ สกปฏิภาณํ เอกํ ธมฺมเทสนํ กเถตุํ วฏฺฏตีติ ภิกฺขุสงฺฆํ สนฺนิปาตาเปตฺวา น ภิกฺขเว เอกวีสติวิธาย อเนสนาย ปจฺจยา อุปฺปาเทตพฺพา, อเนสนาย หิ อุปฺปนฺนปิณฺฑปาโต อาทิตฺตโลหคุฬสทิโส หลาหลวิสูปโม, อเนสนา หิ นาเมสา พุทฺธปจฺเจกพุทฺธพุทฺธสาวเกหิ ครหิตา ปฏิกุฏฺฐา, อเนสนาย อุปฺปนฺนปิณฺฑปาตํ ภุญฺชนฺตสฺส หิ หาโส วา โสมนสฺสํ วา นตฺถิ, เอวํ อุปฺปนฺโน หิ ปิณฺฑปาโต มม สาสเน จณฺฑาลสฺส อุจฺฉิฏฺฐโภชนสทิโส, ตสฺส ปริโภโค สตธมฺมมาณวสฺส จณฺฑาลสฺส อุจฺฉิฏฺฐภตฺตปริโภโค วิย โหตีติ วตฺวา อตีตํ อาหริ ฯ