ตตฺถ ทุทฺททนฺติ ทานํ นาม โลภาทิโทสวสิเกหิ อปณฺฑิเตหิ ทาตุํ น สกฺกา, ตสฺมา ทุทฺททนฺติ วุจฺจติ, ตํ ททมานานํ ฯ กุพฺพตนฺติ ตเทว ทานกมฺมํ สพฺเพหิ กาตุํ น สกฺกา ฯ ทุกฺกรนฺติ ตํ กุรุมานานํ ฯ อสนฺโตติ อปณฺฑิตา พาลา ฯ นานุกุพฺพนฺตีติ ตํ กมฺมํ นานุกโรนฺติ ฯ สตํ ธมฺโมติ ปณฺฑิตานํ สภาโว ฯ ทานํ สนฺธาเยตํ วุตฺตํ ฯ ทุรนฺนโยติ ผลสมฺพนฺธวเสน ทุชฺชาโน เอวรูปสฺส ทานสฺส เอวรูโป ผลวิปาโก โหตีติ ทุรนฺนโย ทุรานุโพโธ ฯ อปิ จ ทุรนฺนโยติ ทุราธิคโม ฯ อปณฺฑิเตหิ ทานํ อทตฺวา ทานผลํ นาม ลทฺธุํ น สกฺกาติปิ อตฺโถ ฯ นานา โหติ อิโต คตีติ อิโต จวิตฺวา ปรโลกํ คจฺฉนฺตานํ ตํ ปฏิสนฺธิคหณํ นานา โหตีติ ฯ อสนฺโต นิรยํ ยนฺตีติ อปณฺฑิตา ทุสฺสีลา ทานํ อทตฺวา สีลํ อรกฺขิตฺวา นิรยํ คจฺฉนฺติ ฯ สนฺโต สคฺคปรายนาติ ปณฺฑิตา ปน ทานํ ทตฺวา สีลํ รกฺขิตฺวา อุโปสถกมฺมํ กตฺวา ตีณิ สุจริตานิ ปูเรตฺวา สคฺคปรายนา โหนฺติ มหนฺตํ สุขสมฺปตฺตึ อนุภวนฺตีติ ฯ

เอวํ โพธิสตฺโต อนุโมทนํ กตฺวา จตฺตาโร วสฺสิเก มาเส ตตฺเถว วสิตฺวา วสฺสาติกฺกเม หิมวนฺตํ คนฺตฺวา ฌานํ นิพฺพตฺเตตฺวา อปริหีนชฺฌาโน พฺรหฺมโลกูปโค อโหสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา อิสิคณา พุทฺธปริสา อเหสุํ, คณสตฺถา ปน อหเมวาติ ฯ

ทุทฺททชาตกํ ทสมํ ฯ