อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส อคฺคมเหสิยา กุจฺฉิมฺหิ ปฏิสนฺธึ คณฺหิ ฯ ตสฺส โสตฺถินา ชาตสฺส นามคฺคหณทิวเส อสทิสกุมาโรติ นามํ กรึสุ ฯ อถสฺส อาธาวิตฺวา ปริธาวิตฺวา วิจรณกาเล อญฺโญ ปุญฺญวา สตฺโต เทวิยา กุจฺฉิมฺหิ ปฏิสนฺธึ คณฺหิ ฯ ตสฺส โสตฺถินา ชาตสฺส นามคฺคหณทิวเส พฺรหฺมทตฺตกุมาโรติ นามํ กรึสุ ฯ เตสุ โพธิสตฺโต โสฬสวสฺสิกกาเล ตกฺกสิลายํ คนฺตฺวา ทิสาปาโมกฺขสฺส อาจริยสฺส สนฺติเก ตโย เวเท อฏฺฐารส จ วิชฺชุฏฺฐานานิ สพฺพสิปฺปานิ จ อุคฺคณฺหิตฺวา อิสฺสาสสิปฺเป อสทิโส หุตฺวา พาราณสึ ปจฺจาคมิ ฯ ราชา กาลํ กุรุมาโน อสทิสกุมารสฺส รชฺชํ ทตฺวา พฺรหฺมทตฺตสฺส อุปรชฺชํ เทถาติ วตฺวา กาลมกาสิ ฯ ตสฺมึ กาลกเต โพธิสตฺโต อตฺตโน รชฺเช ทิยมาเน มยฺหํ รชฺเชน อตฺโถ นตฺถีติ ปฏิกฺขิปิ ฯ พฺรหฺมทตฺตํ รชฺเช อภิสิญฺจึสุ ฯ โพธิสตฺโต มยฺหํ ยเสน อตฺโถ นตฺถีติ กิญฺจิปิ น อิจฺฉิ ฯ กนิฏฺเฐ รชฺชํ กาเรนฺเต ปกติยา ว ราชากาเรเนว วสิ ฯ ราชปาทมูลิกา อสทิสกุมาโร รชฺชํ ปตฺเถตีติ วตฺวา รญฺโญ สนฺติเก โพธิสตฺตํ ปริภินฺทึสุ ฯ โสปิ เตสํ วจนํ คเหตฺวา ปริภินฺนจิตฺโต ภาตรํ เม คณฺหถาติ มนุสฺเส อุยฺโยเชสิ ฯ อเถโก โพธิสตฺตสฺส อตฺถจรโก ตํ การณํ อาโรเจสิ ฯ โพธิสตฺโต กนิฏฺฐภาติกสฺส กุปฺปิตฺวา อญฺญํ รฏฺฐํ คนฺตฺวา เอโก ธนุคฺคโห อาคนฺตฺวา ราชทฺวาเร ฐิโตติ รญฺโญ อาโรจาเปสิ ฯ ราชา กิตฺตกํ โภคํ อิจฺฉตีติ ปุจฺฉิ ฯ เอกสํวจฺฉเร สตสหสฺสนฺติ ฯ สาธุ อาคจฺฉตูติ ฯ อถ นํ อาคนฺตฺวา สมีเป ฐิตํ ปุจฺฉิ ตฺวํ ธนุคฺคโหติ ฯ อาม เทวาติ ฯ สาธุ มํ อุปฏฺฐหีติ ฯ โส ตโต ปฏฺฐาย ราชานํ อุปฏฺฐหิ ฯ ตสฺส ปริพฺพยํ ทิยมานํ ทิสฺวา อติพหุํ ลภตีติ โปราณธนุคฺคหา อุชฺฌายึสุ ฯ อเถกทิวสํ ราชา อุยฺยานํ คนฺตฺวา มงฺคลสิลาปฏฺฏสมีเป สาณิปาการํ ปริกฺขิปาเปตฺวา อมฺพรุกฺขมูเล มหาสยเน นิปนฺโน อุทฺธํ โอโลเกนฺโต รุกฺขคฺเค เอกํ อมฺพปิณฺฑึ ทิสฺวา อิมํ น สกฺกา อภิรูหิตฺวา คณฺหิตุนฺติ ธนุคฺคเห ปกฺโกสาเปตฺวา อิมํ อมฺพปิณฺฑึ สเรน ฉินฺทิตฺวา ปาเตตุํ สกฺขิสฺสถาติ อาห ฯ น เอตํ เทว อมฺหากํ ครุ, เทเวน ปน โน พหุวาเร กมฺมํ ทิฏฺฐปุพฺพํ, อธุนาคโต ธนุคฺคโห อมฺเหหิ พหุตรํ ลภติ, ตํ ปาตาเปถาติ ฯ ราชา โพธิสตฺตํ ปกฺโกสาเปตฺวา สกฺขิสฺสสิ ตาต เอตํ ปาเตตุนฺติ ปุจฺฉิ ฯ เอกํ โอกาสํ ลภมาโน สกฺขิสฺสามีติ ฯ กตรํ โอกาสนฺติ ฯ ตุมฺหากํ สยนสฺส อนฺโตกาสนฺติ ฯ ราชา สยนํ หราเปตฺวา โอกาสํ กาเรสิ ฯ โพธิสตฺตสฺส หตฺเถ ธนุ นตฺถิ, นิวาสนนฺตเร ธนุํ สนฺนยฺหิตฺวา วิจรติ, ตสฺมา สาณึ ลทฺธุํ วฏฺฏตีติ อาห ฯ ราชา สาณึ อาหราเปตฺวา ปริกฺขิปาเปสิ ฯ โพธิสตฺโต อนฺโตสาณึ ปวิสิตฺวา อุปรินิวตฺถวตฺถํ ๑- นีหริตฺวา เอกํ รตฺตวตฺถํ นิวาเสตฺวา กจฺฉํ พนฺธิตฺวา เอกํ รตฺตวตฺถํ อุทเร พนฺธิตฺวา ปสิพฺพกโต สนฺธิยุตฺตํ ขคฺคํ นีหริตฺวา วามปสฺเส สนฺนยฺหิตฺวา สุวณฺณกญฺจุกํ ปฏิมุญฺจิตฺวา จาปนาลึ ปิฏฺฐิยํ สนฺนยฺหิตฺวา สนฺธิยุตฺตํ เมณฺฑกมหาธนุํ อาทาย ปวาฬวณฺณชิยํ อาโรเปตฺวา อุณฺหีสํ สีเส ปฏิมุญฺจิตฺวา ติขิณขุรปฺปํ นเขหิ ปริวตฺตยมาโน สาณึ ทฺวิธา กตฺวา ปฐวึ ผาเลตฺวา อลงฺกตนาคกุมาโร วิย นิกฺขมิตฺวา สรขิปนฏฺฐานํ คนฺตฺวา ขุรปฺปํ สนฺนยฺหิตฺวา ราชานํ อาห กึ มหาราช เอตํ อมฺพปิณฺฑึ อุทฺธํ อาโรหณกณฺเฑน ปาเตมิ อุทาหุ โอโรหณกณฺเฑนาติ ๒- ฯ ตาต พหู มยา อาโรหณกณฺเฑน ปาเตนฺตา ทิฏฺฐปุพฺพา, โอโรหณกณฺเฑน ปาเตนฺตา มยา น ทิฏฺฐปุพฺพา, โอโรหณกณฺเฑน ปาเตหีติ ฯ มหาราช อิทํ กณฺฑํ ทูรํ อาโรหิสฺสติ, ยาว จาตุมฺมหาราชิกภวนํ ตาว คนฺตฺวา สยํ โอโรหิสฺสติ, ยาวสฺส โอโรหณํ ตาว ตุมฺเหหิ อธิวาเสตุํ วฏฺฏตีติ ฯ