ภาตรํ โสตฺถึ กตฺวาน สญฺญมํ อชฺฌุปาคมีติ ฯ

ตตฺถ อสทิโสติ น เกวลํ นาเมเนว พลวิริยปญฺญาหิปิ อสทิโส ว ฯ มหพฺพโลติ กายพเลนปิ มหพฺพโล ฯ ทูเร ปาเหตีติ ยาว จาตุมฺมหาราชิกภวนา ตาวตึสภวนา กณฺฑํ เปเสตุํ สมตฺถตาย ทูเร ปาเหติ ฯ อกฺขณเวธีติ อวิราธิกเวธี ฯ อถ วา อกฺขณํ วุจฺจติ วิชฺชุ, ยาว เอกา วิชฺชุ นิจฺฉรติ ตาว เตโนภาเสน สตฺตฏฺฐวาเร กณฺฑานิ คเหตฺวา วิชฺฌตีติ อกฺขณเวธี ฯ มหากายปฺปทาลิโนติ มหนฺเต กาเย ปทาเลติ ฯ จมฺมกาโย ทารุกาโย โลหกาโย อยกาโย วาลิกกาโย อุทกกาโย ผลกกาโยติ อิเม สตฺตกายา นาม ฯ ตตฺถ อญฺโญ จมฺมกายํ ปทาเลนฺโต มหิสจมฺมมฺปิ วินิวิชฺฌติ ฯ โส ปน สตมฺปิ มหิสจมฺมานิ วินิวิชฺฌติ เยว ฯ อญฺโญ อฏฺฐงฺคุลพหลํ อุทุมฺพรปทรํ จตุรงฺคุลพหลํ อสนปทรํ วินิวิชฺฌติ, โส ปน ผลกสตมฺปิ เอกโต พทฺธํ วินิวิชฺฌติ, ตถา ทฺวงฺคุลพหลํ ตมฺพโลหปฏฺฏํ องฺคุลพหลํ อยปฏฺฏํ วาลิกสกฏสฺส ปทรสกฏสฺส วา ปจฺฉาภาเค กณฺฑํ ปเวเสตฺวา ปุรภาเคน อติปาเตติ ฯ ปกติยา อุทเก จตุอุสุภฏฺฐานํ กณฺฑํ ปเวเสสิ ถเล อฏฺฐุสุภนฺติ เอวํ อิเมสํ สตฺตนฺนํ มหากายานํ ปทาลนโต มหากายปฺปทาลิโน ฯ สพฺพามิตฺเตติ สพฺเพ อมิตฺเต ฯ รณํ กตฺวาติ ยุทฺธํ กตฺวา ปลาเปสีติ อตฺโถ ฯ น จ กิญฺจิ วิเหฐยีติ เอกมฺปิ น วิเหเฐยฺย ฯ อวิเหฐยนฺโต ปน เตหิ สทฺธึ กณฺฑเปสเนน รณํ กตฺวา ฯ สญฺญมํ อชฺฌุปาคมีติ สีลสญฺญมํ ปพฺพชฺชํ อุปคโตติ ฯ

เอวํ สตฺถา อิมํ ธมฺมเทสนํ เทเสตฺวา ชาตกํ สโมธาเนสิ ฯ ตทา กนิฏฺฐภาตา อานนฺโท อโหสิ, อสทิสกุมาโร ปน อหเมวาติ ฯ

อสทิสชาตกํ ปฐมํ ฯ