โตรณานิ จ มทฺทิตฺวา ขิปฺปํ ปวิส กุญฺชราติ ฯ

ตตฺถ อิติ วิสฺสุโตติ ตาต ตฺวํ ปวตฺตสมฺปหารํ สงฺคามํ มทฺทิตฺวา อวจรณโต สงฺคามาวจโร ถิรหทยตาย สูโร ถามสมฺปตฺติยา จ พลวาติ เอวํ วิสฺสุโต ปญฺญาโต ปากโฏ ฯ โตรณมาสชฺชาติ นครทฺวารสงฺฆฏฺฏโตรณํ ปตฺวา ฯ ปฏิกฺกมสีติ กินฺนุ โข โอสกฺกสิ เกน การเณน นิวตฺเตสีติ วทติ ฯ โอมทฺทาติ อวมทฺท อโธปาเตยฺย ฯ เอสิกานิ จ อุพฺพหาติ นครทฺวาเร โสฬสรตนํ อฏฺฐรตนํ ภูมิยํ ปเวเสตฺวา นิจฺจลํ กตฺวา นิขาตา เอสิกา ถมฺภา โหนฺติ, เต ขิปฺปํ อุทฺธร ลุญฺจาติ อาณาเปสิ ฯ โตรณานิ จ มทฺทิตฺวาติ นครทฺวารสฺส ปิฏฺฐิสงฺฆาเฏ มทฺทิตฺวา ฯ ขิปฺปํ ปวิสาติ สีฆํ นครทฺวารํ ปวิส ฯ กุญฺชราติ นาคํ อาลปติ ฯ

ตํ สุตฺวา นาโค โพธิสตฺตสฺส เอโกวาเทเนว นิวตฺติตฺวา เอสิกตฺถมฺเภ โสณฺฑาย ปลิเวเฐตฺวา อหิฉตฺตกานิ วิย ลุญฺจิตฺวา โตรณํ มทฺทิตฺวา ปลีฆํ โอสาเรตฺวา นครทฺวารํ ภินฺทิตฺวา นครํ ปวิสิตฺวา รชฺชํ คเหตฺวา อทาสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา หตฺถี นนฺโท อโหสิ, ราชา อานนฺโท, หตฺถาจริโย ปน อหเมวาติ ฯ