มาตาปิตูหิ เคหา นิกฺกฑฺฒิโต เอกํ ปฏฺฏนคามํ ปตฺวา นาวิกานํ กมฺมกโร หุตฺวา นาวํ อารุยฺห สมุทฺทมชฺเฌ ภินฺนาย นาวาย ผลเก นิปนฺโน ตํ ทีปกํ คนฺตฺวา ผลาผลานิ ปริเยสนฺโต ตํ สูกรํ นิทฺทายนฺตํ ทิสฺวา สณิกํ คนฺตฺวา มณิกฺขนฺธํ คณฺหิตฺวา ตสฺส อานุภาเวน อากาเส อุปฺปติตฺวา อุทุมฺพรรุกฺเข นิสีทิตฺวา จินฺเตสิ อยํ สูกโร อิมสฺส มณิกฺขนฺธสฺส อานุภาเวน อากาสจารี หุตฺวา อิธ วสติ มญฺเญ, มยา ปฐมเมว อิมํ มาเรตฺวา มํสํ ขาทิตฺวา ปจฺฉา คนฺตุํ วฏฺฏตีติ ฯ โส เอกํ ทณฺฑกํ ภญฺชิตฺวา ตสฺส สีเส ปาเตสิ ฯ สูกโร ปพุชฺฌิตฺวา มณิกฺขนฺธํ อปสฺสนฺโต อิโต จิโต จ กมฺปมาโน วิธาวติ ฯ รุกฺเข นิสินฺนปุริโส หสิ ฯ สูกโร โอโลเกนฺโต ตํ ทิสฺวา ตํ รุกฺขํ สีเสน ปหริตฺวา ตตฺเถว มโต ฯ โส ปุริโส โอตริตฺวา อคฺคึ กตฺวา ตสฺส มํสํ ปจิตฺวา ขาทิตฺวา อากาเสน อุปฺปติตฺวา หิมวนฺตปฺปเทสมตฺถเกน คจฺฉนฺโต อสฺสมปทํ ทิสฺวา เชฏฺฐภาติกสฺส ตาปสสฺส อสฺสเม โอตริตฺวา ทฺวีหํ ตีหํ วสิตฺวา ตาปสสฺส วตฺตปฏิวตฺตํ อกาสิ, วาสิผรสุกสฺส อานุภาวญฺจ ปสฺสิ ฯ โส อิมํ มยา คเหตุํ วฏฺฏตีติ มณิกฺขนฺธสฺส อานุภาวํ ตาปสสฺส ทสฺเสตฺวา ภนฺเต อิมํ เม คเหตฺวา วาสิผรสุํ เทถาติ อาห ฯ ตาปโส อากาเสน จริตุกาโม ตํ คเหตฺวา วาสิผรสุํ ตสฺส อทาสิ ฯ โส ตํ คเหตฺวา โถกํ คนฺตฺวา วาสิผรสุํ ปหริตฺวา วาสิผรสุ ตฺวํ ตาปสสฺส สีสํ ฉินฺทิตฺวา มณิกฺขนฺธํ เม อาหราติ อาห ฯ โส คนฺตฺวา ตาปสสฺส สีสํ ฉินฺทิตฺวา มณิกฺขนฺธํ อาหริ ฯ โส วาสิผรสุกํ ปฏิจฺฉนฺนฏฺฐาเน ฐเปตฺวา มชฺฌิมตาปสสฺส สนฺติกํ คนฺตฺวา กติปาหํ วสิตฺวา เภริยา อานุภาวํ ทิสฺวา มณิกฺขนฺธํ ทตฺวา เภรึ คเหตฺวา ปุริมนเยเนว ตสฺสาปิ สีสํ ฉินฺทาเปตฺวา กนิฏฺฐํ อุปสงฺกมิตฺวา ทธิฆฏสฺสานุภาวํ ทิสฺวา มณิกฺขนฺธํ ทตฺวา ทธิฆฏํ คเหตฺวา ปุริมนเยเนว ตสฺส สีสํ ฉินฺทาเปตฺวา มณิกฺขนฺธญฺจ วาสิผรสุกญฺจ เภริญฺจ ทธิฆฏญฺจ คเหตฺวา อากาเส อุปฺปติตฺวา พาราณสิยา อวิทูเร ฐตฺวา พาราณสีราชา ยุทฺธํ วา เม เทตุ รชฺชํ วาติ เอกสฺส ปุริสสฺส หตฺเถ ปณฺณํ ปาเหสิ ฯ ราชา สาสนํ สุตฺวา ว โจรํ คณฺหิสฺสามีติ นิกฺขมิ ฯ โส เอกํ เภริตลํ ปหริ ฯ จตุรงฺคินี เสนา ปริวาเรสิ ฯ รญฺโญ อตฺตโน หตฺเถ คตภาวํ ญตฺวา ทธิฆฏํ วิสฺสชฺเชสิ ฯ มหานที ปวตฺติ ฯ มหาชโน ทธิมฺหิ โอสีทิตฺวา นิกฺขมิตุํ นาสกฺขิ ฯ วาสิผรสุกํ ปหริตฺวา รญฺโญ สีสํ อาหราติ อาห ฯ วาสิผรสุโก คนฺตฺวา รญฺโญ สีสํ อาหริตฺวา ปาทมูเล นิกฺขิปิ ฯ เอโกปิ อาวุธํ อุกฺขิปิตุํ นาสกฺขิ ฯ โส มหนฺเตน พเลน ปริวุโต นครํ ปวิสิตฺวา อภิเสกํ กาเรตฺวา ทธิวาหโน นาม ราชา หุตฺวา ธมฺเมน รชฺชํ กาเรสิ ฯ ตสฺเสกทิวสํ มหานทิยํ ชาลกรณฺฑเก กีฬนฺตสฺส กณฺณมุณฺฑทหโต เทวตาปริโภคํ เอกํ อมฺพปกฺกํ อาคนฺตฺวา ชาเล ลคฺคิ ฯ ชาลํ อุกฺขิปนฺตา ตํ ทิสฺวา รญฺโญ อทํสุ ฯ ตํ มหนฺตํ ฆฏปฺปมาณํ ปริมณฺฑลํ สุวณฺณวณฺณํ อโหสิ ฯ ราชา กิสฺส ผลนฺนาเมตนฺติ วนจรเก ปุจฺฉิตฺวา อมฺพผลนฺติ สุตฺวา ตสฺส อฏฺฐึ อตฺตโน อุยฺยาเน โรปาเปตฺวา ขีโรทเกน สิญฺจาเปสิ ฯ รุกฺโข นิพฺพตฺติตฺวา ตติเย สํวจฺฉเร ผลํ อทาสิ ฯ อมฺพสฺส สกฺกาโร มหา อโหสิ ฯ ขีโรทเกน สิญฺจนฺติ คนฺธปญฺจงฺคุลิกํ เทนฺติ มาลาทามานิ ปริกฺขิปนฺติ คนฺธเตเลน ทีปํ ชาเลนฺติ ฯ ปริกฺเขโป ปนสฺส ปฏสาณิยา อโหสิ ฯ ผลานิ มธุรานิ สุวณฺณวณฺณานิ อเหสุํ ฯ ทธิวาหนราชา อญฺเญสํ ราชูนํ อมฺพผลํ เปเสนฺโต อฏฺฐิโต รุกฺขนิพฺพตฺตนภเยน องฺกุรนิพฺพตฺตนฏฺฐานํ มณฺฑุกณฺฏเกน วิชฺฌิตฺวา เปเสสิ ฯ เตสํ อมฺพํ ขาทิตฺวา อฏฺฐิ โรปิตํ น สมฺปชฺชติ ฯ เต กินฺนุ โข เอตฺถ การณนฺติ ปุจฺฉนฺตา ตํ การณํ อชานึสุ ฯ อเถโก ราชา อุยฺยานปาลํ ปกฺโกสิตฺวา ทธิวาหนสฺส อมฺพผลานํ รสํ นาเสตฺวา ติตฺตกภาวํ กาตุํ สกฺขิสฺสสีติ ปุจฺฉิตฺวา อาม เทวาติ วุตฺเต เตน หิ คจฺฉาติ สหสฺสํ ทตฺวา เปเสสิ ฯ โส พาราณสึ คนฺตฺวา เอโก อุยฺยานปาโล อาคโตติ รญฺโญ อาโรจาเปตฺวา เตน ปกฺโกสาปิโต ปวิสิตฺวา ราชานํ วนฺทิตฺวา ตฺวํ อุยฺยานปาโลติ ปุฏฺโฐ อาม เทวาติ วตฺวา อตฺตโน อานุภาวํ วณฺเณสิ ฯ ราชา คจฺฉ, อมฺหากํ อุยฺยานปาลสฺส สนฺติเก โหหีติ อาห ฯ ตโต ปฏฺฐาย เทฺว ชนา อุยฺยานํ ปฏิปชฺชนฺติ ฯ อธุนาคโต อุยฺยานปาโล อกาลปุปฺผานิ รุกฺเข ปุปฺผาเปนฺโต อกาลผลานิ คณฺหาเปนฺโต อุยฺยานํ รมณียํ อกาสิ ฯ ราชา ตสฺส ปสีทิตฺวา โปราณกอุยฺยานปาลํ นีหราเปตฺวา ตสฺเสว อุยฺยานํ อทาสิ ฯ โส อุยฺยานสฺส อตฺตโน หตฺถคตภาวํ ญตฺวา อมฺพรุกฺขํ ปริวาเรตฺวา นิมฺเพ จ ปคฺคววลฺลิโย จ โรเปสิ ฯ อนุปุพฺเพน นิมฺพา วฑฺฒึสุ ฯ มูเลหิ มูลานิ สาขาหิ จ สาขา สํสฏฺฐา โอนทฺธวินทฺธา อเหสุํ ฯ เตน อสาตอมธุร- สํสคฺเคเนว ตาว มธุรผโล อมฺโพ ติตฺตโก ชาโต นิมฺพปณฺณ- สทิสรโส ฯ อมฺพผลานํ ติตฺตกภาวํ ญตฺวา อุยฺยานปาโล ปลายิ ฯ ทธิวาหโน อุยฺยานํ คนฺตฺวา อมฺพผลํ ขาทนฺโต มุเข ปวิฏฺฐํ อมฺพยูสํ นิมฺพกสาวํ วิย อชฺโฌหริตุํ อสกฺโกนฺโต กกฺกาเรตฺวา นุฏฺฐหิ ฯ ตทา โพธิสตฺโต ตสฺส อตฺถธมฺมานุสาสโก อโหสิ ฯ ราชา โพธิสตฺตํ อามนฺเตตฺวา ปณฺฑิต อิมสฺส รุกฺขสฺส โปราณกปริหารโต ปริหานิ นตฺถิ, เอวํ สนฺเตปิสฺส ผลํ ติตฺตกํ ชาตํ, กินฺนุ โข การณนฺติ ปุจฺฉนฺโต ปฐมํ คาถมาห