เปฯ พลิกมฺมํ กริสฺสามีติ ฯ สา โพธิสตฺตํ ปปาตาภิมุขํ ฐเปตฺวา วนปุปฺเผหิ ปูเชตฺวา ปทกฺขิณํ กตฺวา วนฺทิตุกามา วิย หุตฺวา ปิฏฺฐิปสฺเส ฐตฺวา ปิฏฺฐิยํ ปหริตฺวา ปปาเต ปาเตตฺวา ทิฏฺฐา เม ปจฺจามิตฺตสฺส ปิฏฺฐีติ ตุฏฺฐมานสา ปพฺพตา โอโรหิตฺวา โกณฺฑสฺส สนฺติกํ อคมาสิ ฯ โพธิสตฺโตปิ ปปาตานุสาเรน ปพฺพตา ปตนฺโต อุทุมฺพรรุกฺขมตฺถเก เอกสฺมึ อกณฺฏเก ปตฺตสญฺฉนฺเน คุมฺเพ ลคฺคิ ฯ เหฏฺฐาปพฺพตํ ปน โอโรหิตุํ น สกฺกา ฯ โส อุทุมฺพรานิ ขาทิตฺวา สาขนฺตเร นิสีทิ ฯ อเถโก มหาสรีโร โคธราชา เหฏฺฐาปพฺพตปาทโต อภิรูหิตฺวา ตสฺมึ อุทุมฺพรผลานิ ขาทติ ฯ โส ตํ ทิวสํ โพธิสตฺตํ ทิสฺวา ปลายิ ฯ ปุน ทิวเส อาคนฺตฺวา เอกสฺมึ ปสฺเส ผลานิ ขาทิตฺวา ปกฺกามิ ฯ เอวํ ปุนปฺปุนํ อาคจฺฉนฺโต โพธิสตฺเตน สทฺธึ วิสฺสาสํ อาปชฺชิตฺวา ตฺวํ อิมํ ฐานํ กถํ อาคโตสีติ ปุจฺฉิตฺวา อิมินา การเณนาติ วุตฺเต เตน หิ มา ภายีติ วตฺวา โพธิสตฺตํ อตฺตโน ปิฏฺฐิยํ นิปชฺชาเปตฺวา โอตาเรตฺวา อรญฺญโต นิกฺขมิตฺวา มหามคฺเค ฐเปตฺวา อิมินา มคฺเคน คจฺฉาติ อุยฺโยเชตฺวา อรญฺญเมว ปาวิสิ ฯ โพธิสตฺโต เอกํ คามกํ คนฺตฺวา ตตฺถ วสนฺโต ปิตุ กาลกตภาวํ สุตฺวา พาราณสึ คนฺตฺวา กุลสนฺตเก รชฺเช ปติฏฺฐาย ปทุมราชา นาม หุตฺวา ทส ราชธมฺเม อโกเปตฺวา ธมฺเมน รชฺชํ กาเรนฺโต จตูสุ นครทฺวาเรสุ นครมชฺเฌ นิเวสนทฺวาเร จ ฉ ทานสาลาโย การาเปตฺวา เทวสิกํ ฉ สตสหสฺสานิ วิสฺสชฺเชตฺวา มหาทานํ อทาสิ ฯ สาปิ โข ปาปิตฺถี ตํ โกณฺฑํ ขนฺเธ นิสีทาเปตฺวา อรญฺญา นิกฺขมิตฺวา มนุสฺสปเถ ภิกฺขํ จรมานา ยาคุภตฺตํ สํหริตฺวา ตํ โกณฺฑํ โปเสสิ ฯ อยนฺเต กึ โหตีติ ปุจฺฉิยมานา อหํ เอตสฺส มาตุลธีตา, ปิตุจฺฉาปุตฺโต เม เอส ปุริโส, เอตสฺเสว มํ อทํสุ, สาหํ วชฺฌปฺปตฺตมฺปิ อตฺตโน สามิกํ อุกฺขิปิตฺวา ปริหรนฺตี ภิกฺขํ จริตฺวา โปเสมีติ ฯ มนุสฺสา อยํ ปติพฺพตาติ ฯ ตโต ปฏฺฐาย พหุตรํ ยาคุภตฺตํ อทํสุ ฯ อปเร ชนา เอวมาหํสุ ตฺวํ มา เอวํ วิจริ, ปทุมราชา พาราณสิยํ รชฺชํ กาเรสิ สกลชมฺพุทีปํ สงฺโขเภตฺวา ทานํ เทติ, โส ตํ ทิสฺวา ตุสฺสิสฺสติ ตุฏฺโฐ พหุธนํ ทสฺสติ, ตฺวํ ตว สามิกํ อิธ นิสีทาเปตฺวา คจฺฉาติ ถิรํ กตฺวา เวตฺตปจฺฉึ อทํสุ ฯ สา อนาจารา ตํ โกณฺฑํ เวตฺตปจฺฉิยํ นิสีทาเปตฺวา ปจฺฉึ อุกฺขิปิตฺวา พาราณสึ คนฺตฺวา ทานสาลาสุ ภุญฺชมานา วิจรติ ฯ โพธิสตฺโต อลงฺกตหตฺถิขนฺธวรคโต ทานคฺคํ คนฺตฺวา อฏฺฐนฺนํ วา ทสนฺนํ วา สหตฺถา ทานํ ทตฺวา ปุน เคหํ คจฺฉติ ฯ สา อนาจารา ตํ โกณฺฑํ ปจฺฉิยํ นิสีทาเปตฺวา ปจฺฉึ อุกฺขิปิตฺวา ตสฺส คมนมคฺเค อฏฺฐาสิ ฯ ราชา ตํ ทิสฺวา กึ เอตนฺติ ปุจฺฉิ ฯ เอกา เทว ปติพฺพตาติ ฯ อถ นํ ปกฺโกสาเปตฺวา สญฺชานิตฺวา โกณฺฑํ ปจฺฉิโต นีหราเปตฺวา อยํ เต กึ โหตีติ ปุจฺฉิ ฯ สา ปิตุจฺฉาปุตฺโต เม เทว กุลทตฺติโก สามิโก เมติ อาห ฯ มนุสฺสา ตํ อนฺตรํ อชานิตฺวา อโห ปติพฺพตาติ อาทีนิ วตฺวา ตํ อนาจาริตฺถึ วณฺณยึสุ ฯ ปุน ราชา ตํ อยนฺเต โกณฺโฑ กุลทตฺติโก สามิโกติ ปุจฺฉิ ฯ สา ราชานํ อสญฺชานนฺตี อาม เทวาติ สูรา หุตฺวา กเถติ ฯ อถ นํ ราชา กึ เอส พาราณสีรญฺโญ ปุตฺโต, นนุ ตฺวํ ปทุมกุมารสฺส ภริยา อสุกรญฺโญ ธีตา อสุกา นาม มม ชนฺนุโลหิตํ ปิวิตฺวา อิมสฺมึ โกณฺเฑ ปฏิพทฺธจิตฺตา มํ ปปาเต ปาเตสิ, สา ทานิ ตฺวํ นลาเฏน มจฺจุํ คเหตฺวา มํ มโตติ มญฺญมานา อิมํ ฐานํ อาคตา นนุ อหํ ชีวามีติ วตฺวา อมจฺเจ อามนฺเตตฺวา โภ อมจฺจา นนุ จาหํ ตุมฺเหหิ ปุฏฺโฐ เอวํ กเถสึ, มม ฉ กนิฏฺฐภาติกา ฉ อิตฺถิโย มาเรตฺวา มํสํ ขาทึสุ, อหํ ปน มยฺหํ ภริยํ อโรคํ กตฺวา คงฺคาตีรํ เนตฺวา อสฺสมปเท วสนฺโต เอกํ วชฺฌปฺปตฺตํ โกณฺฑํ อุตฺตาเรตฺวา ปฏิชคฺคึ, สา อิตฺถี ตสฺมึ ปฏิพทฺธจิตฺตา มํ ปพฺพตปฺปปาเต ปาเตสิ, อหํ อตฺตโน เมตฺตจิตฺตตาย ชีวิตํ ลภินฺติ ยาย อหํ ปพฺพตา ปาติโต, น สา อญฺญา เอสา ทุสฺสีลา, โส จ วชฺฌปฺปตฺโต โกณฺโฑ นาม น อญฺโญ อยเมวาติ วตฺวา อิมา คาถา อโวจ