2 Mahāsārajātakaṃ

ukkaṭṭhe sūramicchantīti idaṃ satthā jetavane viharanto āyasmantaṃ ānandattheraṃ ārabbha kathesi.

Ekasmiṃ samaye kosalarañño itthiyo cintayiṃsu buddhuppādo nāma dullabho tathā manussappaṭilābho paripuṇṇāyatanatā ca mayañca imaṃ dullabhaṃ khaṇasamavāyaṃ labhitvāpi attano ruciyā vihāraṃ gantvā dhammaṃ vā sotuṃ pūjaṃ vā kātuṃ dānaṃ vā dātuṃ na labhāma mañjusāya Pakkhittā viya vasāma rañño kathetvā amhākaṃ dhammaṃ kathetuṃ anucchavikaṃ ekaṃ bhikkhuṃ pakkosāpetvā tassa santike dhammaṃ sossāma tato yaṃ sikkhissāma taṃ uggaṇhissāma dānādīni puññāni karissāma evaṃ no ayaṃ khaṇappaṭilābho saphalo bhavissatīti. Tā sabbāpi rājānaṃ upasaṅkamitvā attanā cintitaṃ kāraṇaṃ kathayiṃsu. Rājā sādhūti sampaṭicchitvā athekadivasaṃ uyyānakīḷaṃ kīḷitukāmo uyyānapālaṃ pakkosāpetvā uyyānaṃ sodhehīti āha. Uyyānapālo uyyānaṃ sodhento satthāraṃ aññatarasmiṃ rukkhamūle nisinnaṃ disvā rañño santikaṃ gantvā suddhaṃ deva uyyānaṃ apicettha aññatarasmiṃ rukkhamūle bhagavā nisinnoti āha. Rājā sādhu samma satthu santike dhammaṃ sossāmāti alaṅkatarathaṃ abhiruyha uyyānaṃ gantvā satthu santikaṃ agamāsi.

Tasmiñca samaye chattapāṇi nāmeko anāgāmiupāsako satthu santike dhammaṃ suṇamāno nisinno hoti. Rājā taṃ disvā āsaṅkamāno muhuttaṃ ṭhatvā puna sacāyaṃ pāpako bhaveyya na satthu santike nisīditvā dhammaṃ suṇeyya apāpakena iminā bhavitabbanti cintetvā satthāraṃ upasaṅkamitvā vanditvā ekamantaṃ nisīdi. Upāsako buddhagāravena rañño paccuṭṭhānaṃ vā vandanaṃ vā na akāsi. Tenassa rājā anattamano ahosi. Satthā tassa anattamanabhāvaṃ ñatvā upāsakassa guṇaṃ kathesi ayaṃ mahārāja upāsako bahussuto āgatāgamo kāme vītarāgoti. Rājā na Iminā orakena bhavitabbaṃ yassa satthā guṇaṃ vaṇṇetīti cintetvā upāsaka vadeyyāsi yena te atthoti āha. Upāsako sādhūti sampaṭicchi. Rājā satthu santike dhammaṃ sutvā satthāraṃ padakkhiṇaṃ katvā pakkāmi.