๑๐. อสาตรูปชาดก
10 Asātarūpajātakaṃ
asātaṃ sātarūpenāti idaṃ satthā kuṇḍiyanagaraṃ upanissāya kuṇḍadhānavane viharanto koliyarājadhītaraṃ suppavāsaṃ upāsikaṃ ārabbha kathesi.
Sā hi tasmiṃ samaye satta vassāni kucchinā gabbhaṃ pariharitvā sattāhaṃ mūḷhagabbhā ahosi. Adhimattā vedanā pavattiṃsu. Sā evaṃ adhimattā vedanābhitunnāpi sammāsambuddho vata so bhagavā yo evarūpassa dukkhassa pahānāya dhammaṃ desesi supaṭipanno vatassa bhagavato sāvakasaṅgho yo evarūpassa dukkhassa pahānāya paṭipanno sukhaṃ vata nibbānaṃ yattheva rūpaṃ dukkhaṃ natthīti imehi tīhi vitakkehi dukkhaṃ adhivāsesi. Sā sāmikaṃ pakkosāpetvā tañca attano pavuttiṃ vandanasāsanañca ārocetuṃ satthu santikaṃ pesesi. Satthā vandanasāsanaṃ sutvāva sukhinī hotu suppavāsā koliyadhītā sukhinī arogā arogaṃ puttaṃ vijāyatūti āha. Saha vacanāva pana bhagavato suppavāsā koliyadhītā sukhinī arogā arogaṃ puttaṃ vijāyi. Athassā sāmiko gehaṃ gantvā taṃ vijātaṃ disvā acchariyaṃ vata bhoti ativiya tathāgatassānubhāvoti acchariyabbhutacittajāto ahosi. Suppavāsāpi puttaṃ vijāyitvā sattāhaṃ buddhappamukhassa bhikkhusaṅghassa mahādānaṃ dātukāmā puna nimantanatthāya taṃ pesesi. Tena kho Pana samayena mahāmoggallānassa upaṭṭhākena buddhappamukho bhikkhusaṅgho nimantito hoti. Satthā suppavāsāya dānassa okāsadānatthāya therassa santikaṃ pesetvā taṃ saññāpetvā sattāhaṃ tassā dānaṃ paṭiggahesi saddhiṃ bhikkhusaṅghena.
Sattame pana divase suppavāsā puttaṃ sīvalikumāraṃ maṇḍetvā satthārañca bhikkhusaṅghañca vandāpesi. Tasmiṃ paṭipāṭiyā sārīputtattherassa santikaṃ nīte thero tena saddhiṃ kacci te sīvali khamanīyanti paṭisaṇṭhāraṃ akāsi. So kuto me bhante sukhaṃ svāhaṃ satta vassāni lohakumbhiyaṃ vasinti therena saddhiṃ evarūpaṃ kathaṃ kathesi. Suppavāsā tassa vacanaṃ sutvā sattāhaṃ jāto mama putto anubuddhena dhammasenāpatinā saddhiṃ mantetīti somanassappattā ahosi. Satthā api nu suppavāse aññepi evarūpe putte icchasīti āha. Sace bhante evarūpe aññe satta putte labheyyaṃ iccheyyāmevāhanti. Satthā udānaṃ udānetvā anumodanaṃ katvā pakkāmi. Sīvalikumāropi kho sattavassikakāleyeva sāsane uraṃ datvā pabbajitvā paripuṇṇavasso upasampadaṃ labhitvā puññavā lābhaggayasaggappatto hutvā paṭhaviṃ unnādetvā arahattaṃ patvā puññavantānaṃ antare etadaggaṭṭhānaṃ pāpuṇi. Athekadivasaṃ bhikkhū dhammasabhāyaṃ sannipatitvā āvuso sīvalitthero nāma evarūpo mahāpuñño paṭṭhitapaṭṭhano pacchimabhavikasatto satta vassāni lohakumbhiyaṃ vasi sattāhaṃ mūḷhagabbhabhāvaṃ āpajji aho mātā mahantaṃ dukkhaṃ anubhavi te kinnu Kho kammamakaṃsūti kathaṃ samuṭṭhāpesuṃ. Satthā tattha gantvā kāya nuttha bhikkhave etarahi kathāya sannisinnāti pucchitvā imāya nāmāti vutte bhikkhave sīvalino mahāpuññavatova satta vassāni lohakumbhiyaṃ nivāso ca sattāhaṃ mūḷhagabbhabhāvappatti ca attanā katakammamūlakāva tassā suppavāsāyapi satta vassāni kucchinā gabbhapariharaṇadukkhañca sattāhaṃ mūḷhagabbhadukkhañca attanā katakammamūlakamevāti vatvā tehi yācito atītaṃ āhari.