9 Maghadevajātakaṃ

uttamaṅgaruhā mayhanti idaṃ satthā jetavane viharanto mahābhinikkhamanaṃ ārabbha kathesi. Taṃ heṭṭhā nidānakathāya kathitameva. Tasmiṃ pana kāle bhikkhū dasabalassa nekkhammaṃ vaṇṇayantā nisīdiṃsu. Atha satthā dhammasabhaṃ āgantvā buddhāsane nisinno bhikkhū āmantetvā kāya nuttha bhikkhave etarahi kathāya sannisinnāti pucchi. Bhante na aññāya kathāya tumhākaṃyeva pana nekkhammaṃ vaṇṇayamānā nisinnamhāti. Na bhikkhave tathāgato etarahiyeva nekkhammaṃ nikkhanto pubbepi nikkhantoyevāti āha. Bhikkhū tassatthassāvibhāvatthaṃ bhagavantaṃ yāciṃsu. Bhagavā bhavantarena paṭicchannaṃ kāraṇaṃ pākaṭaṃ akāsi.

Atīte videharaṭṭhe mithilāyaṃ maghadevo nāma rājā ahosi dhammiko dhammarājā. So dīghamaddhānaṃ khepetvā ekadivasaṃ kappakaṃ āmantesi yadā me samma kappaka sirasmiṃ palitāni passeyyāsi atha me āroceyyāsīti. Kappakopi dīghamaddhānaṃ khepetvā ekadivasaṃ rañño añjanavaṇṇānaṃ kesānaṃ antare ekameva palitaṃ disvā deva ekaṃ te palitaṃ dissatīti ārocesi. Tenahi me samma taṃ palitaṃ uddharitvā pāṇimhi ṭhapehīti. Evaṃ vutte suvaṇṇasaṇḍāsena uddharitvā rañño pāṇimhi patiṭṭhāpesi. Tadā rañño caturāsītivassasahassāni āyu avasiṭṭhaṃ ahosi. Evaṃ santepi palitaṃ Disvā maccurājānaṃ āgantvā samīpe ṭhitaṃ viya attānaṃ ādittapaṇṇasālaṃ paviṭṭhaṃ viya ca maññamāno saṃvegaṃ āpajjitvā bālamaghadeva yāva palitassuppādā nāma ime kilese jahituṃ nāsakkhīti cintesi. Tasseva palitapātubhūtaṃ āvajjentassa antodāho uppajji sarīre sedā muñciṃsu sāṭakā pīḷetvā apanetabbākārappattā ahesuṃ. So ajjeva mayā nikkhamitvā pabbajituṃ vaṭṭatīti. Kappakassa sattasahassuṭṭhānakaṃ gāmavaraṃ datvā jeṭṭhaputtaṃ pakkosāpetvā tāta mama sīse palitaṃ pātubhūtaṃ mahallakomhi jāto bhuttā kho pana me manussakāmā idāni dibbakāme pariyesissāmi nekkhammakālo mayhaṃ tvaṃ idaṃ rajjaṃ paṭipajja ahaṃ pana pabbajitvā maghadevaambavanuyyāne vasanto samaṇadhammaṃ karissāmīti āha. Taṃ evaṃ pabbajitukāmaṃ amaccā upasaṅkamitvā deva kiṃ tumhākaṃ pabbajjākāraṇanti pucchiṃsu. Rājā palitaṃ hatthena gahetvā amaccānaṃ idaṃ gāthamāha