10 Sukhavihārijātakaṃ

yañca aññe na rakkhantīti idaṃ satthā anupiyanagaraṃ nissāya anupiyaambavane viharanto sukhavihāriṃ bhaddiyattheraṃ ārabbha kathesi. Sukhavihārī bhaddiyatthero chakhattiyasamāgame upālisattamo pabbajito. Tesu bhaddiyatthero ca kimbilatthero ca bhagutthero ca upālitthero ca arahattaṃ pattā ānandatthero sotāpanno jāto anuruddhatthero dibbacakkhuko devadatto jhānalābhī jāto. Channaṃ pana khattiyānaṃ vatthu yāva anupiyanagarā kaṇḍahālajātake āvibhavissati. Āyasmā pana bhaddiyo rājakāle attānaṃ rakkhanto rakkhāsaṃvidhānadevatāva bahūhi rakkhāhi rakkhiyamānassa upari pāsādatale mahāsayane parivattamānassāpi attano bhayuppattiñca disvā idāni arahattaṃ patvā Araññādīsu yatthakatthaci viharantopi attano vigatabhayattañca samanupassanto aho sukhaṃ aho sukhanti udānaṃ udānesi. Taṃ sutvā bhikkhū āyasmā bhaddiyo aññaṃ byākarotīti bhagavato ārocesuṃ. Bhagavā na bhikkhave bhaddiyo idāneva sukhavihārīyeva pubbepi sukhavihārīyevāti āha. Bhikkhū tassatthassāvibhāvatthāya bhagavantaṃ yāciṃsu. Bhagavā bhavantarena paṭicchannaṃ kāraṇaṃ pākaṭaṃ akāsi.

Atīte bārāṇasiyaṃ brahmadatte rajjaṃ kārayamāne bodhisatto udiccabrāhmaṇamahāsālo hutvā kāmesu ādīnavaṃ nekkhamme cānisaṃsaṃ disvā kāme pahāya himavantaṃ pavisitvā isipabbajjaṃ pabbajitvā aṭṭha samāpattiyo nibbattesi. Parivāropissa mahā ahosi pañca tāpasasatāni. So vassakāle himavantato nikkhamitvā tāpasagaṇaparivuto gāmanigamādīsu cārikañcaranto bārāṇasiṃ patvā rājānaṃ nissāya rājuyyāne vāsaṃ kappesi. Tattha vassike cattāro māse vasitvā rājānaṃ āpucchi. Atha naṃ rājā bhante tumhe mahallakā kiṃ vo himavantena antevāsike himavantaṃ pesetvā idheva vasathāti yāci. Bodhisatto jeṭṭhantevāsikaṃ pañca tāpasasatāni sampaṭicchāpetvā gaccha tvaṃ imehi saddhiṃ himavante vasa ahampana idheva vasissāmīti te uyyojetvā sayaṃ tattheva vāsaṃ kappesi. So panassa jeṭṭhantevāsiko rājapabbajito mahantaṃ rajjaṃ pahāya pabbajitvā kasiṇaparikammaṃ katvā aṭṭhasamāpattilābhī ahosi. So tāpasehi saddhiṃ himavante vasamāno ekadivasaṃ ācariyaṃ daṭṭhukāmo Hutvā te tāpase āmantetvā tumhe anukkaṇṭhamānā idheva vasatha ahaṃ ācariyaṃ disvā āgacchissāmīti ācariyassa santikaṃ gantvā vanditvā paṭisanthāraṃ katvā ekaṃ taṭṭikaṃ attharitvā ācariyassa santikeyeva nipajji. Tasmiṃ ca samaye rājā tāpasaṃ passissāmīti uyyānaṃ gantvā vanditvā ekamantaṃ nisīdi. Antevāsikatāpaso rājānaṃ disvāpi neva uṭṭhāsi nipannakoyeva pana aho sukhaṃ aho sukhanti udānaṃ udānesi. Rājā ayaṃ tāpaso maṃ disvāpi na uṭṭhitoti anattamano bodhisattaṃ āha bhante ayaṃ tāpaso yathicchakaṃ bhutto bhavissati udānaṃ udānento sukhaseyyameva kappetīti. Mahārāja ayaṃ tāpaso pubbe tumhādisova eko rājā ahosi svāyaṃ ahaṃ pubbe gihikāle rajjasiriṃ anubhavanto āvudhahatthehi bahūhi rakkhiyamānopi evarūpaṃ sukhaṃ nāma nālatthanti attano pabbajjāsukhaṃ jhānasukhaṃ ārabbha idaṃ udānaṃ udānesīti evañca pana vatvā bodhisatto rañño dhammakathaṃ kathetuṃ idaṃ gāthamāha