7. Babbujātakaṃ

yattheko labhate babbūti idaṃ satthā jetavane viharanto kāṇamātāsikkhāpadaṃ ārabbha kathesi. Sāvatthiyaṃ hi kāṇamātā nāma dhītuvasena pākaṭanāmā upāsikā ahosi sotāpannā ariyasāvikā. Sā dhītaraṃ kāṇaṃ aññatarasmiṃ gāmake samānajātiyassa purisassa adāsi. Kāṇā kenacideva karaṇīyena mātu gharaṃ agamāsi. Athassā sāmiko katipāhaccayena dūtaṃ pāhesi āgacchatu kāṇā icchāmi kāṇāya āgatanti. Kāṇā dūtassa vacanaṃ sutvā amma gamissāmīti mātaraṃ āpucchi. Kāṇamātā ettakaṃ kālaṃ vasitvā kathaṃ tucchahatthā gamissasīti pūvaṃ paci. Tasmiṃyeva khaṇe eko piṇḍapātacāriko bhikkhu tassā nivesanaṃ agamāsi. Upāsikā taṃ nisīdāpetvā pattapūraṃ pūvaṃ dāpesi. So kkhu nikkhamitvā aññassa ācikkhi. Tassāpi tatheva dāpesi. Sopi nikkhamitvā aññassa ācikkhi. Tassāpi tatheva dāpesi. Sopi nikkhamitvā aññassa ācikkhi. Tassāpi tathevāti evampi catunnaṃ janānaṃ dāpesi. Yathāpaṭiyattaṃ pūvaṃ parikkhayaṃ agamāsi. Kāṇāya gamanaṃ na sampajji. Athassā sāmiko dutiyampi dūtaṃ pāhesi tatiyaṃ pāhentova sace kāṇā nāgacchissati ahaṃ aññaṃ pajāpatiṃ ānessāmīti pāhesi. Tayopi vāre teneva upāyena gamanaṃ na sampajji. Kāṇāya sāmiko aññaṃ pajāpatiṃ ānesi. Kāṇā Taṃ pavuttiṃ sutvā rodamānā aṭṭhāsi.

Satthā taṃ kāraṇaṃ ñatvā pubbaṇhasamayaṃ nivāsetvā pattacīvaramādāya kāṇamātāya nivesanaṃ gantvā paññattāsane nisīditvā kāṇamātaraṃ pucchi kissāyaṃ kāṇā rodatīti iminā nāma kāraṇenāti ca sutvā kāṇamātaraṃ samassāsetvā dhammakathaṃ kathetvā uṭṭhāyāsanā vihāraṃ agamāsi. Atha tesaṃ catunnaṃ bhikkhūnaṃ tayo vāre yathāpaṭiyattaṃ pūvaṃ gahetvā kāṇāya gamanassa upacchinnabhāvo bhikkhusaṅghe pākaṭo jāto. Athekadivasaṃ bhikkhū dhammasabhāyaṃ kathaṃ samuṭṭhāpesuṃ āvuso catūhi nāma bhikkhūhi tayo vāre kāṇamātāya pakkapūvaṃ khāditvā kāṇāya gamanantarāyaṃ katvā sāmikena pariccattaṃ dhītaraṃ nissāya mahāupāsikāya domanassaṃ uppāditanti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva te cattāro bhikkhū kāṇamātāya santakaṃ khāditvā tassā domanassaṃ uppādesuṃ pubbepi uppādesuṃyevāti vatvā atītaṃ āhari.