2. Sigālajātakaṃ

etaṃ hi te durājānanti idaṃ satthā veḷuvane viharanto devadattassa vadhāya parisakkanaṃ ārabbha kathesi .pe.

Dhammasabhāyaṃ hi bhikkhūnaṃ kathaṃ sutvā satthā na bhikkhave devadatto idāneva mayhaṃ vadhāya parisakkati pubbepi parisakkiyeva na ca maṃ māretuṃ asakkhi sayameva pana kilantoyevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto sigālayoniyaṃ nibbattitvā sigālarājā hutvā sigālagaṇaparivuto susānavane vihāsi. Tena samaye rājagahe ussavo ahosi. Yebhuyyena manussā suraṃ pivanti . Surāchaṇoyeva kireso. Athettha sambahulā dhuttā bahuṃ surañca maṃsañca āharāpetvā maṇḍitappasādhitā gāyitvā surañca pivanti maṃsañca khādanti. Tesaṃ paṭhamayāmāvasāne maṃsaṃ khīṇaṃ surā pana bahukāva. Atheko maṃsakhaṇḍaṃ dehīti āha maṃsaṃ khīṇanti ca vutte mayi ṭhite maṃsakkhayo nāma natthīti vatvā āmakasusāne matamanussamaṃsaṃ khādanatthāya āgataṃ sigālaṃ māretvā maṃsaṃ āharissāmīti muggaraṃ gahetvā niddhamanamaggena nagarā nikkhamitvā susānaṃ gantvā muggaraṃ gahetvā matako viya uttāno nipajji. Tasmiṃ khaṇe bodhisatto Sigālagaṇaparivuto tattha gato taṃ disvā nāyaṃ matakoti ñatvāpi suṭṭhutaraṃ upaparikkhissāmīti tassa adhovāte ṭhatvā sarīragandhaṃ ghāyitvā tattatovassa amatabhāvaṃ ñatvā lajjāpetvā naṃ uyyojessāmīti gantvā muggarakoṭiyaṃ ḍaṃsitvā ākaḍḍhi. Dhutto muggaraṃ na vissajjesi upasaṅkamantaṃpi na olokento naṃ gāḷhataraṃ aggahesi. Bodhisatto paṭikkamitvā bho purisa sace tvaṃ matako bhaveyyāsi na mayi muggaraṃ ākaḍḍhante gāḷhataraṃ gaṇheyyāsi iminā kāraṇena tava matabhāvo vā amatabhāvo vā dujjānoti vatvā imaṃ gāthamāha