6. Kākajātakaṃ

api nū hanukā santāti idaṃ satthā jetavane viharanto sambahule mahallake bhikkhū ārabbha kathesi.

Te kira gihikāle sāvatthiyaṃ kuṭumbikā aḍḍhā mahaddhanā aññamaññasahāyakā ekato hutvā puññāni karontā satthu dhammadesanaṃ sutvā mayaṃ mahallakā kinno gharāvāsena satthu santike ramaṇīye buddhasāsane pabbajitvā dukkhassantaṃ karissāmāti sabbaṃ sāpateyyaṃ puttanattādīnaṃ datvā assumukhaṃ ñātisaṅghaṃ pahāya satthāraṃ pabbajjaṃ yācitvā pabbajiṃsu pabbajitvā ca pana pabbajjānurūpaṃ samaṇadhammaṃ na kariṃsu mahallakabhāvena dhammampi na pariyāpuṇiṃsu gihikāle viya pabbajitakālepi vihārapariyante paṇṇasālaṃ kāretvā ekatova vasiṃsu piṇḍāya carantāpi aññattha agantvā yebhuyyena attano puttadārasseva gehaṃ gantvā bhuñjiṃsu. Tesu ekassa Purāṇadutiyikā sabbesaṃpi mahallakattherānaṃ upakārikā ahosi. Tasmā sesāpi attanā laddhamāhāraṃ gahetvā tassāyeva gehe nisīditvā bhuñjanti. Sāpi tesaṃ yathāsannihitaṃ sūpabyañjanaṃ deti. Sā aññatarena ābādhena phuṭṭhā kālamakāsi. Atha te mahallakattherā vihāraṃ gantvā aññamaññaṃ gīvāsu gahetvā madhurahattharasā upāsikā kālakatāti vihārapaccante rodantā vicariṃsu. Tesampana saddaṃ sutvā ito cito ca bhikkhū sannipatitvā āvuso kasmā rodathāti pucchiṃsu. Te amhākaṃ sahāyassa purāṇadutiyikā madhurahattharasā kālakatā amhākaṃ ativiya upakārakā idāni kuto tathārūpaṃ labhissāma iminā kāraṇena rodimhāti āhaṃsu. Tesaṃ taṃ vippakāraṃ disvā bhikkhū dhammasabhāyaṃ kathaṃ samuṭṭhāpesuṃ āvuso iminā nāma kāraṇena mahallakattherā aññamaññaṃ gīvāsu gahetvā vihārapaccante rodantā vicarantīti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva te tassā kālakiriyāya rodantā vicaranti pubbepete imaṃ kākayoniyaṃ nibbattitvā samudde mataṃ nissāya samuddā udakaṃ ussiñcitvā etaṃ nīharissāmāti vāyamantā paṇḍite nissāya jīvitaṃ labhiṃsūti vatvā atītaṃ āhari.