๘. สิคาลชาดก
8. Sigālajātakaṃ
nāhaṃ punaṃ na ca punanti idaṃ satthā jetavane viharanto kilesaniggahaṃ ārabbha kathesi.
Sāvatthiyaṃ kira pañcasatamattā sahāyakā mahāvibhavā seṭṭhiputtā satthu dhammadesanaṃ sutvā sāsane uraṃ datvā pabbajitvā jetavane antokoṭisaṇṭhāre vihariṃsu. Athekadivasaṃ tesaṃ aḍḍharattasamaye kilesanissito saṅkappo uppajji. Te ukkaṇṭhitā attano jahitakilese puna gaṇhituṃ cittaṃ uppādayiṃsu. Atha satthā aḍḍharattasamanantare sabbaññutañāṇadaṇḍadīpakaṃ ukkhipitvā katarāya nu kho ratiyā jetavane bhikkhū viharantīti bhikkhūnaṃ ajjhāsayaṃ olokento tesaṃ bhikkhūnaṃ abbhantare kāmarāgasaṅkappassa uppannabhāvaṃ aññāsi. Satthā ca nāma ekaputtikā itthī attano puttaṃ viya Ekacakkhuko puriso cakkhuṃ viya attano sāvake rakkhati pubbaṇhādīsu yasmiṃ yasmiṃ samaye tesaṃ kilesā uppajjanti te tesaṃ kilese tato paraṃ vaḍḍhituṃ adatvā tasmiṃ tasmiṃyeva samaye niggaṇhāti. Tenassa etadahosi ayaṃ cakkavattirañño antonagareyeva corānaṃ uppajjanakālo viya vattati idāneva tesaṃ dhammadesanaṃ sutvā kilese niggaṇhitvā arahattaṃ dassāmīti. So surabhigandhakuṭito nikkhamitvā madhurassarena ānandāti āyasmantaṃ dhammabhaṇḍāgārikaṃ ānandattheraṃ āmantesi. Thero kiṃ bhanteti āgantvā vanditvā aṭṭhāsi. Ānanda yattakā bhikkhū antokoṭisaṇṭhāre viharanti sabbeva gandhakuṭipariveṇe sannipātehīti. Evaṃ kirassa ahosi sacāhaṃ teyeva pañcasate bhikkhū pakkosāpessāmi satthārā no abbhantare kilesānaṃ uppannabhāvo ñātoti saṃviggamānasā dhammadesanaṃ paṭicchituṃ na sakkhissantīti. Tasmā sabbe sannipātehīti āha. Thero sādhu bhanteti apāpuraṇaṃ ādāya pariveṇena pariveṇaṃ āhiṇḍitvā sabbe bhikkhū gandhakuṭipariveṇe sannipātetvā buddhāsanaṃ paññāpesi.
Satthā pallaṅkaṃ ābhujitvā ujuṃ kāyaṃ paṇidhāya silāpaṭhaviyaṃ patiṭṭhahamāno sineru viya paññattabuddhāsane nisīdi āveḷāveḷāyamakayamakā chabbaṇṇaghanabuddharaṃsiyo vissajjento. Tāpi raṃsiyo pātīmattā chattamattā kūṭāgārakucchimattā chijjitvā chijjitvā gaganatale vijjulatā viya sañcariṃsu. Aṇṇavakucchiṃ khobhetvā Bālasuriyuggamanakālo viya ahosi. Bhikkhusaṅghopi satthāraṃ vanditvā garucittaṃ paccupaṭṭhapetvā rattakambalasāṇiṃ parikkhipanto viya parivāretvā nisīdi. Satthā brahmassaraṃ nicchārento bhikkhū āmantetvā bhikkhave bhikkhunā nāma kāmavitakkaṃ byāpādavitakkaṃ vihiṃsāvitakkanti ime tayo akusalavitakke vitakketuṃ na vaṭṭati anto uppannakileso hi parittakoti avaññātuṃ na vaṭṭati kileso nāma paccāmittasadiso paccāmitto ca khuddako nāma natthi okāsaṃ labhitvā vināsameva pāpeti evameva appamattakopi kileso uppajjitvā vaḍḍhituṃ labhanto mahāvināsaṃ pāpeti kileso nāmesa halāhalavisūpamo uppāditacchavikaṇḍusadiso āsīvisappaṭibhāgo asaniaggisadiso allīyituṃ na yutto āsaṅkitabbo uppannakkhaṇeyeva paṭisaṅkhābalena bhāvanābalena yathā muhuttaṃpi hadaye aṭṭhatvā paduminipattā udakavindūni viya vivattanti evaṃ vijahitabbo porāṇakapaṇḍitāpi appamattakaṃ kilesaṃ garahitvā yathā puna abbhantare na uppajjati evaṃ niggaṇhiṃsūti vatvā atītaṃ āhari.