10 Sañjīvajātakaṃ

asantaṃ yo paggaṇhātīti idaṃ satthā veḷuvane viharanto ajātasattussa rañño asantaṃ sampaggahaṃ ārabbha kathesi.

So hi buddhānaṃ paṭikaṇṭakabhūte dussīle pāpadhamme devadatte pasīditvā taṃ asantaṃ asappurisaṃ paggayha tassa sakkāraṃ karissāmīti bahuṃ dhanaṃ pariccajitvā gayāsīse vihāraṃ kāretvā tassa vacanaṃ gahetvā pitaraṃ dhammarājānaṃ sotāpannaṃ ariyasāvakaṃ ghātetvā attano sotāpattimaggassa upanissayaṃ chinditvā mahāvināsaṃ patto. So Hi devadatto paṭhaviṃ paviṭṭhoti sutvā kacci nu kho mampi paṭhavī gileyyāti bhītatasito rajjasukhaṃ na labhati sayane assādaṃ na vindati tibbakāraṇābhitunno peto viya kampamāno vicarati. So paṭhaviṃ gilamānaṃ viya avīcijālaṃ nikkhamantaṃ viya attānaṃ ādittāya lohapaṭhaviyā uttānaṃ nipajjāpetvā ayasūlehi koṭṭiyamānaṃ viya ca samanupassi. Tenassa pahaṭakukkuṭasseva muhuttampi kampamānassa avaṭṭhānaṃ nāma nāhosi. Sammāsambuddhaṃ passitukāmo khamāpetukāmo pañhaṃ pucchitukāmo ahosi attano pana aparādhamahantatāya upasaṅkamitaṃ na sakkoti.

Athassa rājagahanagare kattikarattivāre sampatte devanagare viya alaṅkate mahātale amaccagaṇaparivutassa kāñcanāsane nisinnassa jīvakaṃ komārabhaccaṃ avidūre nisinnaṃ disvā etadahosi jīvakaṃ gahetvā sammāsambuddhassa santikaṃ gamissāmi na kho pana sakkā mayā ujukameva gantuṃ ahaṃ samma jīvaka sayaṃ gantuṃ na sakkomi ehi maṃ satthu santikaṃ nehīti anekapariyāyenassa rattisampadaṃ vaṇṇetvā kiṃ nu kho ajja mayaṃ samaṇaṃ vā brāhmaṇaṃ vā payirūpāseyyāma yanno payirūpāsataṃ cittaṃ pasīdeyyāti vakkhāmi taṃ sutvā amaccā attano satthārānaṃ vaṇṇaṃ kathessanti jīvakopi sammāsambuddhassa vaṇṇaṃ kathessati atha naṃ gahetvā satthu santikaṃ gacchissāmīti. So pañcahi padehi rattiṃ vaṇṇesi