8 Sakuṇagghijātakaṃ

seno balasā patamānoti idaṃ satthā jetavane viharanto attano ajjhāsayaṃ sakuṇovādasuttaṃ ārabbha kathesi.

Ekadivasaṃ hi satthā bhikkhū āmantetvā gocare bhikkhave caratha sake pettike visayeti imaṃ saṃyuttaṃ mahāvagge suttantaṃ kathento tumhe tāva tiṭṭhatha, pubbepi tiracchānagatāpi sakaṃ visayaṃ pahāya agocare carantā paccāmittānaṃ hatthapathaṃ gantvā attano paññāsampattiyā upāyakosallena paccāmittānaṃ hatthā mucciṃsūti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto lāpasakuṇayoniyaṃ nibbattitvā naṅgalakaṭṭhakaraṇe leḍḍuṭṭhāne vāsaṃ kappesi. So ekadivasaṃ sakavisaye gocaragahaṇaṃ pahāya paravisaye gocaraṃ gahessāmīti aṭavipariyantaṃ agamāsi. Atha naṃ tattha gocaraṃ pariggaṇhantaṃ disvā sakuṇagghi sahasā ajjhappattā aggahesi. So sakuṇagghiyā hariyamāno evaṃ paridevesi mayameva mahāalakkhikā mayaṃ appapuññā yeva, mayaṃ agocare carimhā paravasaye, sacajja mayaṃ gocare careyyāma sake pettikavisaye, na myāyaṃ sakuṇagghi alaṃ abhavissa yadidaṃ yuddhāyāti. Ko pana te lāpa gocaro sako pettiko visayoti. Yadidaṃ naṅgalakaṭṭhakaraṇaṃ leḍḍuṭṭhānanti. Atha naṃ sakuṇagghi sake bale atthaddhā amuñci gaccha bho tvaṃ lāpa, tatthāpi gantvā na mokkhasīti. So tattha gantvā mahantaṃ leḍḍuṃ abhirūhitvā ehi khodāni sakuṇagghīti senaṃ avhayanto aṭṭhāsi. Sakuṇagghi sake bale apatthaddhā ubho pakkhe sandhāya lāpasakuṇa sahasā ajjhappattā. Yadā pana taṃ lāpo bahuāgato kho myāyaṃ sakuṇagghīti aññāsi, atha parivattitvā tasseva leḍḍussa antaraṃ paccāpādi. Sakuṇagghi vegaṃ sandhāretuṃ asakkonto tattheva uraṃ paccaphālesi. Evaṃ so bhinnena hadayena nikkhantehi akkhīhi jīvitakkhayaṃ pāpuṇi.