2 Daddarajātakaṃ

ko nu saddena mahatāti idaṃ satthā jetavane viharanto kokālikaṃ ārabbha kathesi.

Tasmiṃ hi kāle bahussutā bhikkhū manosilātale nisinnā sīhanādaṃ nadantā taruṇasīhā viya ākāsagaṅgaṃ otārentā viya saṅghamajjhe padabhāṇaṃ bhaṇanti. Kokāliko tesu padabhāṇaṃ bhaṇantesu Attano tucchabhāvaṃ ajānitvā va ahampi padabhāṇaṃ bhaṇissāmīti bhikkhūnaṃ antare pavisitvā amhākaṃ padabhāṇaṃ na pāpenti, sace amhākaṃ pāpeyyuṃ, mayampi bhaṇeyyāmāti bhikkhusaṅghassa nāmaṃ gahetvā va tattha tattha kathento āhiṇḍati. Tassa sā kathā bhikkhusaṅghe pākaṭā jātā. Bhikkhū vimaṃsissāma tāva nanti saññāya evamāhaṃsu āvuso kokālika ajja saṅghassa padabhāṇaṃ bhaṇāhīti. So attano balaṃ ajānitvā va sādhūti sampaṭicchitvā ajja padabhāṇaṃ bhaṇissāmīti attano sappāyaṃ yāguṃ pivi khajjanaṃ khādi sappāyeneva sūpena bhuñji. Suriye aṭṭhaṅgate dhammassavanakāle ghosite bhikkhusaṅgho sannipati. So kaṇṭakuraṇḍavaṇṇaṃ kāsāvaṃ nivāsetvā kaṇṇikārapupphavaṇṇaṃ cīvaraṃ pārupitvā saṅghamajjhaṃ pavisitvā theraṃ vanditvā alaṅkataratanamaṇḍape paññattavaradhammāsanaṃ abhirūhitvā cittavījaniṃ gahetvā padabhāṇaṃ bhaṇissāmīti nisīdi. Tāvadevassa sarīrā sedā mucciṃsu, sārajjaṃ okkami. Pubbagāthāya paṭhamapadaṃ udāharitvā antaraṃ na passi. So kampamāno āsanā oruyha lajjito saṅghamajjhato apakkamma attano pariveṇaṃ agamāsi. Añño bahussuto bhikkhu padabhāṇaṃ bhaṇi. Tato paṭṭhāya bhikkhū tassa tucchabhāvaṃ jāniṃsu. Athekadivasaṃ dhammasabhāyaṃ kathaṃ samuṭṭhāpesuṃ āvuso paṭhamaṃ kokālikassa tucchabhāvo dujjāno, idāni pana sayaṃ naditvā pākaṭo jātoti. Satthā āgantvā kāya nuttha bhikkhave etarahi kathāya sannisinnāti

Pucchitvā imāya nāmāti vutte na bhikkhave idāneva kokāliko naditvā pākaṭo jāto pubbepi naditvā pākaṭo ahosīti vatvā atītaṃ āhari.