4 Maṇicorajātakaṃ

na santi devā pavasanti nūnāti idaṃ satthā veḷuvane viharanto vadhāya parisakkantaṃ devadattaṃ ārabbha kathesi.

Devadatto vadhāya parisakkatīti sutvā na bhikkhave idāneva pubbepi devadatto mayhaṃ vadhāya parisakkati yeva, parisakkantopi maṃ vadhituṃ nāsakkhīti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto bārāṇasito avidūre gāmake gahapatikule nibbatti. Athassa vayappattassa bārāṇasito kuladhītaraṃ ānesuṃ. Sā piyā ahosi abhirūpā dassanīyā devaccharā viya pupphalatā viya vilāsamānā mattakinnarī viya ca sujātāti nāmena patibbatā sīlācārasampannā vattasampannā. Niccakālampissā pativattaṃ sassuvattaṃ sasuravattañca katameva hoti. Sā bodhisattassa piyā ahosi manāpā. Iti te ubhopi sammodamānā ekaggacittā samaggasaṃvāsaṃ vasiṃsu. Athekadivasaṃ sujātā mātāpitaro daṭṭhukāmamhīti bodhisattassa ārocesi. So sādhu bhadde magge pātheyyaṃ pahonakaṃ paṭiyādehīti khajjakavikatiṃ pacāpetvā khajjakādīni yānake ṭhapetvā yānakaṃ pājento yānakassa purato ahosi, itarā pacchato. Te nagarasamīpaṃ gantvā yānakaṃ mocetvā nhātvā bhuñjiṃsu. Puna bodhisatto yānakaṃ yojetvā Purato nisīdi. Sujātā vatthāni parivattetvā alaṅkaritvā pacchato nisīdi. Yānakassa antonagaraṃ paviṭṭhakāle bārāṇasīrājā hatthikkhandhavaragato nagaraṃ padakkhiṇaṃ karonto taṃ padesaṃ agamāsi. Sujātā otaritvā yānakassa pacchato padasā va pāyāsi. Rājā taṃ disvā tassā rūpasampattiyā ākaḍḍhiyamānaso paṭibaddhacitto hutvā ekaṃ amaccaṃ gaccha etissā sassāmikabhāvaṃ vā assāmikabhāvaṃ vā jānāhīti pesesi. So gantvā tassā sassāmikabhāvaṃ ñatvā sassāmikā kira deva yānake nisinno puriso etissā sāmikoti āha. Rājā paṭibaddhacittataṃ vinodetuṃ asakkonto kilesāturo hutvā ekena upāyena māretvā itthiṃ gahessāmīti cintetvā ekaṃ purisaṃ āmantetvā gaccha bho imaṃ cuḷāmaṇiṃ ādāya vīthiṃ gacchanto viya etassa purisassa yānake pakkhipitvā ehīti cuḷāmaṇiṃ datvā uyyojesi. So sādhūti taṃ gahetvā gantvā yānake ṭhapetvā ṭhapito me devāti āgantvā ārocesi. Rājā cuḷāmaṇi me naṭṭhoti āha. Manussā ekakolāhalaṃ akaṃsu. Rājā sabbadvārāni pidahitvā sañcāraṃ chinditvā coraṃ pariyesathāti āha. Rājapurisā tathā akaṃsu. Nagaraṃ ekasaṅkhobhitaṃ ahosi. Itaro puriso manusse gahetvā bodhisattassa santikaṃ gantvā bho yānakaṃ ṭhapehi, rañño cuḷāmaṇi naṭṭho, yānakaṃ sodhessāmīti yānakaṃ sodhento attanā ṭhapitamaṇiṃ gahetvā bodhisattaṃ gahetvā maṇicorosīti hatthehi ca pādehi ca pothetvā gahetvā taṃ Pacchābāhuṃ bandhitvā netvā ayaṃ maṇicoroti rañño dasseti. Rājā sīsamassa chindathāti āṇāpesi. Atha naṃ rājapurisā catukke catukke kasāhi tāḷentā dakkhiṇadvārena nagarā nikkhamiṃsu. Sujātāpi yānakaṃ pahāya bāhā paggayha paridevamānā sāmi maṃ nissāya imaṃ dukkhaṃ pattosīti paridevamānā pacchato agamāsi. Rājapurisā sīsamassa chindissāmāti bodhisattaṃ uttānaṃ nipajjāpesuṃ . Taṃ disvā sujātā attano sīlaguṇaṃ āvajjitvā natthi vata maññe imasmiṃ loke sīlavantānaṃ viheṭhanake pāpasāhasikamanusse nisedhetuṃ samatthā devā nāmāti ādīni paridevamānā paṭhamaṃ gāthamāha