8 Kāsāvavaggavaṇṇanā

1 kāsāvajātakaṃ.

Anikkasāvo kāsāvanti idaṃ satthā jetavane viharanto devadattaṃ ārabbha kathesi. Vatthu pana rājagahe samuṭṭhitaṃ.

Ekasmiṃ samaye dhammasenāpati pañcahi bhikkhusatehi saddhiṃ veḷuvane viharati. Atha devadattopi attano anurūpāya dussīlaparisāya parivuto gayāsīse viharati. Tasmiṃ samaye rājagahavāsino chandakaṃ saṃharitvā dānaṃ sajjayiṃsu. Atheko vohāratthāya āgatavāṇijo imaṃ sāṭakaṃ vissajjetvā mampi pattikaṃ karothāti mahagghaṃ gandhakāsāvaṃ adāsi. Nāgarā mahādānaṃ pavattayiṃsu. Sabbaṃ chandakena saṅkaḍḍhitaṃ kahāpaṇeheva niṭṭhāsi. So sāṭako atireko ahosi. Mahājanā sannipatitvā ayaṃ gandhakāsāvasāṭako atireko, kassa naṃ dussaṃ dassāma, kiṃ mayaṃ sāriputtassa dassāma udāhu devadattassāti mantayiṃsu. Tattheke sāriputtattherassāti āhaṃsu. Apare sāriputtatthero katipāhaṃ vasitvā yathāruciṃ pakkamissati, devadattatthero pana nibaddhaṃ amhākaṃ nagarameva upanissāya viharati, maṅgalāvamaṅgalesu ayameva amhākaṃ avassayo, devadattassa dassāmāti āhaṃsu. Sambahulikaṃ kathentesupi devadattassa dassāmāti vattāro bahū ahesuṃ. Atha naṃ devadattassa adaṃsu. Devadatto tassa dussā chindāpetvā ovaṭṭikaṃ sibbāpetvā rajāpetvā suvaṇṇapattavaṇṇaṃ katvā pārupi. Tasmiṃ kāle tiṃsamattā bhikkhū rājagahā sāvatthiṃ gantvā satthāraṃ vanditvā katapaṭisanthārā taṃ pavattiṃ ārocetvā evaṃ bhante devadatto attano ananucchavikaṃ arahattaddhajaṃ pārupīti ārocesuṃ. Satthā na bhikkhave devadatto idāneva attano ananurūpaṃ arahattaddhajaṃ paridahati, pubbepi paridahati yevāti vatvā atītaṃ āhari.