4 Vigaticchajātakaṃ

yaṃ passati na taṃ icchatīti idaṃ satthā jetavane viharanto ekaṃ palāyiparibbājakaṃ ārabbha kathesi.

So kira sakalajambudīpe paṭivādaṃ alabhitvā sāvatthiṃ āgantvā ko mayā saddhiṃ vādaṃ kātuṃ samatthoti pucchitvā sammāsambuddhoti sutvā mahājanaparivuto jetavanaṃ gantvā bhagavantaṃ catuparisamajjhe dhammaṃ desentaṃ pañhaṃ pucchi. Athassa satthā taṃ vissajjetvā ekaṃ nāma kinti pañhaṃ pucchi. So taṃ kathetuṃ asakkonto uṭṭhāya palāyi. Nisinnaparisā ekapadeneva vo bhante paribbājako niggahitoti āhaṃsu. Satthā nāhaṃ upāsakā idāneva taṃ ekapadeneva niggaṇhāmi, pubbepi niggaṇhāmi yevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto kāsikaraṭṭhe brāhmaṇakule nibbattetvā vayappatto kāme pahāya isipabbajjaṃ pabbajitvā dīgharattaṃ himavante vasi. So pabbatā oruyha ekaṃ nigamagāmaṃ nissāya gaṅgānivattane paṇṇasālāyaṃ vāsaṃ kappesi. Atheko paribbājako sakalajambudīpe paṭivādaṃ alabhitvā taṃ nigamagāmaṃ patvā atthi nu kho koci mayā saddhiṃ vādaṃ kātuṃ samatthoti pucchitvā atthīti bodhisattassa ānubhāvaṃ sutvā mahājanaparivuto tassa vasanaṭṭhānaṃ gantvā paṭisanthāraṃ katvā nisīdi. Atha naṃ bodhisatto vaṇṇagandhaparibhāvitaṃ gaṅgāpānīyaṃ Pavissasīti pucchi. Paribbājako vādena ottharanto kā gaṅgā vālukāgaṅgā udakagaṅgā orimatīragaṅgā pārimatīragaṅgāti āha. Bodhisatto tvaṃ pana paribbājaka ṭhapetvā udakavālukaṃ orimatīrañca pārimatīrañca kahaṃ gaṅgaṃ labhissasīti āha. Paribbājako appaṭibhāṇo hutvā uṭṭhāya palāyi. Tasmiṃ palāte bodhisatto sannisinnaparisāya dhammaṃ desento imā gāthā avoca