6 Bālovādajātakaṃ

hantvā ghatvā vadhitvā cāti idaṃ satthā vesāliyaṃ upanissāya kūṭāgārasālāyaṃ viharanto sīhasenāpatiṃ ārabbha kathesi.

So hi bhagavantaṃ saraṇaṃ gantvā nimantetvā samaṃsakaṃ bhattaṃ adāsi. Nigaṇṭhā taṃ sutvā kupitā anattamanā tathāgataṃ viheṭhetukāmā samaṇo gotamo jānaṃ uddissa kataṃ maṃsaṃ bhuñjatīti akkosiṃsu. Bhikkhū dhammasabhāyaṃ kathaṃ samuṭṭhāpesuṃ āvuso nigaṇṭhanāṭaputto samaṇo gotamo jānaṃ uddissa kataṃ maṃsaṃ bhuñjatīti saddhiṃ parisāya akkosanto āhiṇḍatīti. Taṃ sutvā satthā na bhikkhave nigaṇṭho nāṭaputto idāneva maṃ uddissa kataṃ maṃsaṃ khādanena garahati, pubbepi garahi yevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbattitvā vayappatto isipabbajjaṃ pabbajitvā loṇambilasevanatthāya himavantato bārāṇasiṃ āgantvā punadivase nagaraṃ bhikkhāya pāvisi. Atheko kuṭumbiko tāpasaṃ viheṭhessāmīti gharaṃ pavesetvā paññatte āsane nisīdāpetvā macchamaṃsena parivisitvā bhattakiccāvasāne ekamantaṃ nisīditvā idaṃ maṃsaṃ tumhe yeva uddissa pāṇe māretvā kataṃ, idaṃ akusalaṃ mā amhākameva tumhākampi hotūti vatvā paṭhamaṃ gāthamāha