kuṇḍakakucchisindhavajātakaṃ

bhutvā tiṇaparighāsanti idaṃ satthā jetavane viharanto sārīputtattheraṃ ārabbha kathesi.

Ekasmiṃ hi samaye sammāsambuddho sāvatthiyaṃ vasitvā vassaṃ vuṭṭho cārikaṃ caritvā puna paccāgato. Manussā āgantukasakkāraṃ karissāmāti buddhappamukhassa bhikkhusaṅghassa mahādānaṃ dadanti. Vihāre ekaṃ dhammaghosakaṃ bhikkhuṃ ṭhapesuṃ. So ye āgantvā yattake bhikkhū icchanti tesaṃ te bhikkhū vicāretvā deti. Athekā duggatā mahallikā itthī ekameva paṭiviṃsaṃ sajjetvā tesaṃ manussānaṃ bhikkhūsu vicāretvā dinnesu ussure dhammaghosakassa santikaṃ āgantavā mayhaṃ ekaṃ bhikkhuṃ dethāti āha. So mayā sabbe bhikkhū vicāretvā dinnā sārīputtatthero pana vihāreyeva Vasati tvaṃ tassa bhikkhaṃ dehīti āha. Sā sādhūti tuṭṭhacittā jetavanadvārakoṭṭhake ṭhatvā therassa āgatakāle vanditvā hatthato pattaṃ gahetvā gharaṃ netvā gehe nisīdāpesi. Ekāya kira mahallikāya dhammasenāpati attano ghare nisīdāpitoti bahūni saddhāni kulāni assosuṃ. Tesu rājā passenadikosalo taṃ pavuttiṃ sutvā tassā sāṭakena ca sahassatthavikāya ca saddhiṃ bhattabhojanāni pahiṇi mayhaṃ ayyaṃ parivisamānā imaṃ sāṭakaṃ nivāsetvā ime kahāpaṇe valañjetvā theraṃ parivisatūti. Yathā ca rājā evaṃ anāthapiṇḍiko cullaanāthapiṇḍiko visākhā mahāupāsikāpi pahiṇiṃsu. Aññāni pana kulāni ekasatadvesatādivasena attano balānurūpena kahāpaṇe pahiṇiṃsu. Evaṃ ekāheneva sā mahallikā satasahassamattaṃ labhi. Thero pana tāya dinnaṃ yāgumeva pivitvā tāya kataṃ khajjakameva pakkabhattameva ca paribhuñjitvā bhattānumodanaṃ katvā taṃ mahallikaṃ sotāpattiphale patiṭṭhāpetvā vihārameva agamāsi. Dhammasabhāyaṃ bhikkhū therassa guṇakathaṃ samuṭṭhāpesuṃ āvuso dhammasenāpati mahallikaṃ gahapatāniṃ duggatabhāvato mocetvā patiṭṭhā ahosi tāya dinnaṃ āhāraṃ ajigucchanto paribhuñjatīti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave sārīputto idāneva etissā mahallikāya avassayo jāto na idāneva tāya dinnaṃ āhāramajigucchanto paribhuñjati pubbepi paribhuñjatiyevāti vatvā atītaṃ āhari.