7 Abhiṇhajātakaṃ

nālaṃ kabalaṃ padātaveti idaṃ satthā jetavane viharanto ekaṃ upāsakañca mahallakattherañca ārabbha kathesi.

Sāvatthiyaṃ kira dve sahāyā. Tesu eko pabbajitvā devasikaṃ itarassa gharaṃ gacchati. So tassa bhikkhaṃ datvā sayaṃpi bhuñjitvā teneva saddhiṃ vihāraṃ gantvā yāva suriyassaṭṭhaṅgamā allāpasallāpena nisīditvā nagaraṃ pavisati. Itaropi naṃ yāva nagaradvārā anugantvā nivattati. So tesaṃ vissāso bhikkhūnaṃ antare pākaṭo jāto. Athekadivasaṃ bhikkhū tesaṃ vissāsakathaṃ kathentā dhammasabhāyaṃ nisīdiṃsu. Satthā āgantvā kāya nuttha bhikkhave etarahi kathāya sannisinnāti pucchi. Te imāya nāma bhanteti kathayiṃsu. Satthā na bhikkhave ime idāneva vissāsikā pubbepi vissāsikāva ahesunti vatvā atītaṃ āhari.

Atīte bārāṇasiyaṃ brahmadatte rajjaṃ kārente tadā bodhisatto tassa amacco ahosi. Tadā eko kukkuro maṅgalahatthisālaṃ gantvā maṅgalahatthissa bhuñjanaṭṭhāne patitāni bhattasitthāni khādati. So teneva bhojanena saṃvaḍḍhamāno maṅgalahatthissa vissāsiko jāto hatthisseva santike bhuñjati. Ubhopi vinā vattituṃ na sakkonti. So hatthī naṃ soṇḍāya gahetvā aparāparaṃ karonto kīḷati ukkhipitvā kumbhepi ṭhapesi. Athekadivasaṃ eko gāmikamanusso hatthigopakassa mūlaṃ datvā taṃ kukkuraṃ ādāya attano gāmaṃ agamāsi. Tato Paṭṭhāya so hatthī kukkuraṃ apassanto neva khādati na pivati na nhāyati. Tamatthaṃ rañño ārocayiṃsu. Rājā bodhisattaṃ pahiṇi gaccha paṇḍita jānāhi kiṃkāraṇā hatthī evaṃ karotīti. Bodhisatto hatthisālaṃ gantvā hatthissa dummanabhāvaṃ ñatvā imassa sarīre rogo na paññāyati kenaci panassa saddhiṃ mittasanthavena bhavitabbaṃ taṃ apassanto esa maññe sokābhibhūtoti hatthigopake pucchi atthi nu kho imassa kenaci saddhiṃ vissāsoti. Āma sāmi ekena sunakhena saddhiṃ balavavissāsametīti. Kahaṃ so etarahīti. Ekena manussena nītoti. Jānātha panassa nivāsanaṭṭhānanti. Na jānāmi sāmīti. Bodhisatto rañño santikaṃ gantvā natthi deva hatthissa koci ābādho ekena panassa sunakhena saddhiṃ balavavissāso taṃ apassanto na bhuñjati maññeti vatvā imaṃ gāthamāha