samuddajātakaṃ

ko nvāyanti idaṃ satthā jetavane viharanto upanandattheraṃ

Ārabbha kathesi.

So hi mahagghaso mahātaṇho ahosi. Sakaṭapūrehi paccayehipi santappetuṃ na sakkā. Vassupanāyikakāle dvīsu tīsu vihāresu vassaṃ upagantvā ekasmiṃ upāhanā ṭhapesi ekasmiṃ udakatumbaṃ ekasmiṃ kattarayaṭṭhiṃ ṭhapesi ekasmiṃ sayaṃ vasati janapadavihāraṃ gantvā paṇītaparikkhāre bhikkhū disvā ariyavaṃsakathaṃ kathetvā te paṃsukūlāni gāhāpetvā tesaṃ cīvarāni gaṇhati mattikāpatte gāhāpetvā manāpamanāpe patteyeva thālakādīni ca gahetvā yānakaṃ pūretvā jetavanaṃ āgacchati. Athekadivasaṃ bhikkhū dhammasabhāyaṃ kathaṃ samuṭṭhāpesuṃ āvuso upanando sakyaputto mahagghaso mahiccho aññesaṃ paṭipattiṃ kathetvā samaṇaparikkhārehi yānakaṃ pūretvā āgacchatīti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte ayuttaṃ bhikkhave upanandena kataṃ paresaṃ ariyavaṃsakathaṃ kathentena paṭhamataraṃ hi attanā appicchena hutvā pacchā paresaṃ ariyavaṃsakathaṃ kathetuṃ vaṭṭatīti