sayhajātakaṃ

sasamuddaparisāsanti idaṃ satthā jetavane viharanto ukkaṇṭhitabhikkhuṃ ārabbha kathesi.

So hi sāvatthiyaṃ piṇḍāya caranto ekaṃ abhirūpaṃ alaṅkataitthiṃ disvā ukkaṇṭhito sāsane nābhirami. Atha naṃ bhikkhū bhagavato dassesuṃ. So bhagavatā saccaṃ kira tvaṃ bhikkhu ukkaṇṭhitoti puṭṭho saccanti vatvā ko taṃ ukkaṇṭhāpesīti vutte tamatthaṃ ārocesi. Satthā kasmā tvaṃ evarūpe niyyānike sāsane pabbajitvā ukkaṇṭhasi pubbe paṇḍitā purohitaṭṭhānaṃ labhantāpi taṃ paṭikkhipitvā pabbajiṃsūti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto purohitassa brāhmaṇiyā kucchismiṃ paṭisandhiṃ gahetvā rañño puttena saddhiṃ ekadivasaṃ vijāyi. Rājā atthi nukho me koci puttena Saddhiṃ ekadivase jātoti amacce pucchi. Atthi mahārāja purohitassa puttoti. Rājā taṃ āṇāpetvā dhātīnaṃ datvā puttena saddhiṃ ekatova paṭijaggāpesi. Ubhinnampi ābharaṇāni ceva pānabhojanādīni ca ekasadisāneva ahesuṃ. Te vayappattā ekatova takkasilāyaṃ gantvā sabbasippāni uggaṇhitvā āgamiṃsu. Rājā puttassa uparajjaṃ adāsi. Mahāyaso ahosi. Tato paṭṭhāya bodhisatto rājaputtena saddhiṃ ekatova khādati pivati sayati. Aññamaññaṃ vissāso thiro ahosi. Aparabhāge rājaputto pitu accayena rajje patiṭṭhāya mahāsampattiṃ anubhavi. Bodhisatto cintesi mayhaṃ sahāyo rajjaṃ anusāsati sallakkhitakkhaṇeyeva kho pana mayhaṃ purohitaṭṭhānaṃ dassati kiṃ me gharāvāsena pabbajitvā vivekamanubrūhissāmīti. So mātāpitaro vanditvā pabbajjaṃ anujānāpetvā mahāsampattiṃ chaḍḍetvā ekakova nikkhamitvā himavantaṃ pavisitvā manorame bhūmibhāge paṇṇasālaṃ māpetvā isipabbajjaṃ pabbajitvā abhiññā ca samāpattiyo ca nibbattetvā jhānakīḷaṃ kīḷanto vihāsi. Tadā rājā taṃ anussaritvā mayhaṃ sahāyo na paññāyati kuhiṃ soti pucchi. Amaccā tassa pabbajitabhāvaṃ ārocetvā ramaṇīye kira vanasaṇḍe vasatīti āhaṃsu. Rājā tassa vasanokāsaṃ pucchitvā sayhaṃ nāma amaccaṃ gaccha sahāyaṃ me gahetvā ehi purohitaṭṭhānamassa dassāmīti āha. So sādhūti sampaṭicchitvā bārāṇasito nikkhamma anupubbena Paccantagāmaṃ patvā tattha khandhāvāraṃ ṭhapetvā vanacarakehi saddhiṃ bodhisattassa vasanokāsaṃ gantvā bodhisattaṃ paṇṇasāladvāre suvaṇṇapaṭimaṃ viya nisinnaṃ disvā vanditvā ekamantaṃ nisīditvā katapaṭisanthāro bhante rājā te purohitaṭṭhānaṃ dātukāmo āgamanaṃ icchatīti āha. Bodhisatto tiṭṭhatu purohitaṭṭhānaṃ ahaṃ sakalakāsikosalajambūdīparajjaṃ cakkavattisirimeva vā labhantopi na icchissāmi na hi paṇḍitā sakiṃ jahite kilese puna gaṇhanti sakiṃ jahitaṃ hi nuṭṭhakheḷasadisanti vatvā imā gāthā abhāsi