maṃsajātakaṃ

pharusā vata te vācāti idaṃ satthā jetavane viharanto sārīputtattherena pītavirecanānaṃ dinnarasapiṇḍapātaṃ ārabbha kathesi.

Tadā kira jetavane ekacce bhikkhū sinehavirecanaṃ piviṃsu. Tesaṃ rasapiṇḍapātena attho hoti. Gilānupaṭṭhākā rasabhattaṃ āharissāmāti sāvatthiyaṃ pavisitvā odanīyagharavīthiyaṃ piṇḍāya caritvāpi rasabhattaṃ alabhitvā nivattiṃsu. Thero divātaraṃ piṇḍāya pavisamāno te bhikkhū disvā kiṃ āvuso atipageva nivattitthāti pucchi. Te tamatthaṃ ārocesuṃ. Thero tenahi ethāti te gahetvā tameva vīthiṃ agamāsi. Manussā pūretvā pūretvā rasabhattaṃ adaṃsu. Gilānupaṭṭhākā vihāraṃ āharitvā gilānānaṃ adaṃsu. Te rasaṃ paribhuñjiṃsu. Athekadivasaṃ bhikkhū dhammasabhāyaṃ kathaṃ samuṭṭhāpesuṃ āvuso thero kira pītavirecanānaṃ upaṭṭhāke rasabhattaṃ alabhitvā nikkhamante gahetvā odanīyagharavīthiyaṃ caritvā bahurasapiṇḍapātaṃ pesesīti. Satthā āgantvā kāyanuttha bhikkhave etarahi kathāya sannisinnāti Pucchitvā imāya nāmāti vutte na bhikkhave idāneva sārīputto varamaṃsaṃ labhi pubbepi muduvācā piyavacanaṃ vattuṃ chekā paṇḍitā labhiṃsūti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto seṭṭhiputto ahosi. Athekadivasaṃ eko migaluddako bahumaṃsaṃ labhitvā yānakaṃ pūretvā vikkīṇissāmīti nagaraṃ āgacchati. Tadā bārāṇasīvāsikā cattāro seṭṭhiputtā nagarā nikkhamitvā ekasmiṃ maggasabhāge ṭhāne kiñci diṭṭhaṃ sutaṃ samullapantā nisīdiṃsu. Etesu eko seṭṭhiputto taṃ maṃsayānakaṃ disvā etaṃ luddakaṃ maṃsakhaṇḍaṃ āharāpemīti pucchi. Gaccha āharāpehīti. So taṃ upasaṅkamitvā are luddaka dehi me maṃsakhaṇḍanti āha. Luddako paraṃ kiñci yācantena nāma piyavacanena bhavitabbaṃ tayā kathitavācāya anucchavikaṃ maṃsakhaṇḍaṃ labhissasīti vatvā paṭhamaṃ gāthamāha