kuntinījātakaṃ

avasimhā tavāgāreti idaṃ satthā jetavane viharanto kosalarañño gehe nivutthaṃ kuntinīsakuṇikaṃ ārabbha kathesi.

Sā kira rañño dūteyyahārikā. Dve potakāpissā atthi. Rājā taṃ sakuṇikaṃ ekassa rañño paṇṇaṃ gāhāpetvā pesesi. Tassā gatakāle rājakule dārakā te sakuṇapotake hatthena parimaddantā māresuṃ. Sā āgantvā te potake mate passantī kena me puttakā māritāti pucchi. Asukena ca asukena cāti. Tasmiñca kāle rājakule posāvanikabyaggho atthi kakkhalo pharuso bandhanavasena tiṭṭhati. Atha te dārakā taṃ byagghaṃ dassanāya agamaṃsu. Sāpi sakuṇikā tehi saddhiṃ gantvā yathā imehi mama puttakā māritā tatheva ne karissāmīti te dārake gahetvā byagghassa pādamūle khipi. Byaggho murumurāpetvā khādi. Sā idāni

Me manoratho paripuṇṇoti uppatitvā himavantameva gatā. Taṃ kāraṇaṃ sutvā bhikkhū dhammasabhāyaṃ kathaṃ samuṭṭhāpesuṃ āvuso rājakule kira kuntinīsakuṇikā yehissā potakā māritā te dārake byagghassa pādamūle khipitvā himavantameva gatāti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva pubbepesā attano potakaghātake dārake khipitvā himavantameva gatāti vatvā atītaṃ āhari.