3 Sammodamānajātakaṃ

sammodamānāti idaṃ satthā kapilavatthuṃ upanissāya nigrodhārāme viharanto ñātakakalahaṃ ārabbha kathesi.

So kuṇālajātake āvibhavissati. Tadā pana satthā ñātake āmantetvā mahārājāno ñātakānaṃ aññamaññaṃ viggaho nāma na yutto tiracchānagatāpi hi pubbe samaggakāle paccāmitte abhibhavitvā sotthimpattā yadā vivādamāpannā tadā mahāvināsaṃ pattāti vatvā ñātirājakulehi yācito atītaṃ āhari.

Atīte bārāṇasiyaṃ brahmadatte rajjaṃ kārente bodhisatto vaṭṭakayoniyaṃ nibbattitvā anekavaṭṭakasahassaparivāro araññe vasati. Tadā eko vaṭṭakaluddako tesaṃ vasanaṭṭhānaṃ gantvā vaṭṭakavassitaṃ katvā tesaṃ sannipatitabhāvaṃ ñatvā tesaṃ upari jālaṃ khipitvā pariyantesu maddanto sabbe ekato katvā pacchiṃ pūretvā gharaṃ gantvā te vikkiṇitvā tena mūlena jīvitaṃ kappesi. Athekadivasaṃ bodhisatto te vaṭṭake āha ayaṃ sākuṇiko amhākaṃ ñātake vināsaṃ pāpesi ahaṃ ekaṃ upāyaṃ jānāmi yenesa amhe gaṇhituṃ na sakkhissati itodāni paṭṭhāya etena amhākaṃ upari jāle khittamatte ekekā ekekasmiṃ jālakkhike sīsaṃ ṭhapetvā jālaṃ ukkhipitvā icchitaṭṭhānaṃ Haritvā ekasmiṃ kaṇṭakagumbe parikkhipatha evaṃ sante heṭṭhābhāgena tena ṭhānena palāyissāmāti. Te sabbe sādhūti paṭissuṇiṃsu. Dutiyadivase upari jāle khitte bodhisattena vuttanayeneva jālaṃ ukkhipitvā ekasmiṃ kaṇṭakagumbe khipitvā sayaṃ heṭṭhābhāgena tato tato palāyiṃsu. Sākuṇikassa gumbato jālaṃ mocentassa mocentasseva vikālo jāto. So tucchahatthova agamāsi. Punadivasato paṭṭhāyapi te vaṭṭakā tatheva karonti. Sopi yāva suriyassaṭṭhaṅgamanā jālameva mocento kañci alabhitvā tucchahatthova gehaṃ gacchati. Athassa bhariyā kujjhitvā tvaṃ divase divase tucchahattho āgacchasi aññampi te bahi positabbaṭṭhānaṃ atthi maññeti āha. Sākuṇiko bhadde mama aññaṃ positabbaṭṭhānaṃ natthi apica kho pana te vaṭṭakā samaggā hutvā vicaranti mayā khittamattaṃ jālaṃ ādāya kaṇṭakagumbe khipitvā gacchanti na kho panete sabbakālameva sammodamānā viharissanti tvaṃ mā cintayi yadā te vivādamāpajjissanti tadā te sabbeva ādāya tava mukhaṃ hāsamāno āgamissāmīti vatvā bhariyāya imaṃ gāthamāha