Setaketujātakaṃ

mā tāta kujjhi na hi sādhu kodhoti idaṃ satthā jetavane viharanto kuhakaṃ bhikkhuṃ ārabbha kathesi. Paccuppannavatthuṃ kuddālajātake āvībhavissati.

Atīte bārāṇasiyaṃ brahmadatte rajjaṃ kārente bodhisatto bārāṇasiyaṃ disāpāmokkho ācariyo hutvā pañcasatamāṇave mante vācesi. Tesaṃ jeṭṭhako setaketu nāma uddiccabrāhmaṇakule nibbattamāṇavo. Tassa jātiṃ nissāya mahanto māno ahosi. So ekadivasaṃ aññehi māṇavehi saddhiṃ nagarā nikkhamanto nagaraṃ pavisantaṃ ekaṃ caṇḍālaṃ disvā kosi tvanti pucchitvā caṇḍālohamasmīti vutte tassa sarīraṃ paharitvā āgatavātassa attano sarīre phusanabhayena nassa caṇḍāla kāḷakaṇṇi adhovātaṃ yāhīti vatvā vegena tassa uparivātaṃ agamāsi. Caṇḍālopi sīghataraṃ gantvā tassa uparivāte aṭṭhāsi. Atha naṃ so nassa vasala kāḷakaṇṇīti suṭṭhutaraṃ akkosi paribhāsi. Taṃ sutvā caṇḍālo tvaṃ kosīti pucchi. Brāhmaṇamāṇavohamasmīti. Brāhmaṇo hotu mayā pana puṭṭhapañhaṃ kathetuṃ sakkhissasīti. Āma sakkhissāmīti. Sacepi na sakkosi pādantarena taṃ gamemīti. So attānaṃ takketvā āgamehīti āha. Caṇḍālaputto tassa kathaṃ parisaṃ gāhāpetvā Māṇava disā nāma katarāti pañhaṃ pucchi. Disā nāma puratthimādayo catasso disāti. Caṇḍālo ahantaṃ etaṃ disaṃ na pucchāmi tvaṃ ettakampi ajānanto mama sarīre pahatavātaṃ jigucchasīti taṃ khandhaṭṭhike gahetvā onametvā attano pādantarena gamesi. Māṇavā taṃ pavattiṃ ācariyassa ācikkhiṃsu. Taṃ sutvā ācariyo saccaṃ kira tāta setaketu caṇḍālenasi pādantarena gamitoti. Āmācariya so maṃ caṇḍāladāsīputto disāmattampi na jānāsīti vatvā attano pādantarena gamesi idāni disvā kattabbamassa jānissāmīti kuddho caṇḍālaputtaṃ akkosi paribhāsi. Atha naṃ ācariyo tāta setaketu mā tassa kujjha paṇḍito caṇḍālaputto na so taṃ etaṃ disaṃ pucchati aññaṃ disaṃ pucchi tayā pana diṭṭhasutaviññātato adiṭṭhāsutaaviññātameva bahutaranti ovadanto dve gāthā abhāsi