Aṭṭhisenajātakaṃ

ye me ahaṃ na jānāmīti idaṃ satthā āḷaviṃ nissāya aggāḷave cetiye viharanto kuṭikārasikkhāpadaṃ ārabbha kathesi. Paccuppannavatthuṃ heṭṭhā maṇikaṇṭhakajātake kathitasadisameva.

Satthā pana te bhikkhū āmantetvā bhikkhave porāṇakapaṇḍitā pubbe anuppanne buddhe bāhirakapabbajjāya pabbajitvā rājūhi pavāritā piyayācanā nāma paresaṃ appiyā amanāpāti na yāciṃsūti vatvā atītaṃ āhari

atīte bārāṇasiyaṃ brahmadatte rajjaṃ kārente bodhisatto ekasmiṃ nigame brāhmaṇakule nibbatti. Aṭṭhisenakumārotissa nāmaṃ kariṃsu. So vayappatto takkasilāyaṃ sabbasippāni uggaṇhitvā aparabhāge kāmesu ādīnavaṃ disvā gharāvāsato nikkhamitvā isipabbajjaṃ pabbajitvā abhiññā ca samāpattiyo ca nibbattetvā himavantappadese ciraṃ vasitvā loṇambilasevanatthāya manussapathaṃ otaritvā anupubbena bārāṇasiyaṃ patvā rājuyyāne vasitvā punadivase bhikkhāya caranto rājaṅgaṇaṃ agamāsi. Rājā tassa ācāravihāre pasīditvā taṃ pakkosāpetvā pāsādatale pallaṅke nisīdāpetvā subhojanaṃ bhojetvā bhojanāvasāne anumodanaṃ sutvā pasanno paṭiññaṃ gahetvā mahāsattaṃ rājuyyāne vāsesi divasassa ca dve tayo vāre upaṭṭhānaṃ Agamāsi. So ekadivasaṃ dhammakathāya pasanno rajjaṃ ādiṃ katvā yena te attho taṃ vadeyyāthāti pavāresi. Bodhisatto idaṃ nāma me dehi idaṃ nāma me dehīti na vadati. Aññe yācakā idaṃ dehi idaṃ dehīti icchiticchitaṃ yācanti. Rājā asajjamāno deti. So ekadivasaṃ cintesi aññe yācakavanibbakā idañcidañca amhākaṃ dehīti maṃ yācanti ayyo pana aṭṭhiseno pavāritakālato paṭṭhāya na kiñci yācati paññavā kho panesa upāyakusalo pucchissāmi nanti. So ekadivasaṃ bhuttapātarāso gantvā vanditvā ekamantaṃ nisinno aññesaṃ yācanakāraṇaṃ tassa ca ayācanakāraṇaṃ pucchanto paṭhamaṃ gāthamāha