2 Kapotajātakaṃ

yo atthakāmassāti idaṃ satthā jetavane viharanto aññataraṃ lolabhikkhuṃ ārabbha kathesi.

Tassa lolabhāvo navanipāte kākajātake āvibhavissati. Tadā pana taṃ bhikkhuṃ ayaṃ bhante bhikkhu loloti satthu ārocesuṃ. Atha naṃ satthā saccaṃ kira tvaṃ bhikkhu loloti pucchi. Āma Bhanteti. Satthā pubbepi tvaṃ bhikkhu lolo lolakāraṇā jīvitakkhayaṃ patto paṇḍitāpi taṃ nissāya attano vasanaṭṭhānā parihīnāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto pārāvatayoniyaṃ nibbatti. Tadā bārāṇasīvāsino puññakāmatāya tasmiṃ tasmiṃ ṭhāne sakuṇānaṃ sukhavasanatthāya thusapacchiyo olambanti. Tadā bārāṇasīseṭṭhinopi bhattakārako antomahānase evaṃ thusapacchiṃ olambetvā ṭhapesi. Bodhisatto tattha vāsaṃ kappesi. So pātova nikkhamitvā gocare caritvā sāyaṃ āgantvā tattha vasanto kālaṃ khepesi. Athekadivasaṃ eko kāko mahānasamatthakena gacchanto ambilānambilamacchamaṃsānaṃ dhūpanavāsaṃ ghāyitvā lobhaṃ uppādetvā kiṃ nu kho nissāya imaṃ macchamaṃsaṃ labhissāmīti avidūre nisīditvā pariggaṇhanto sāyaṃ bodhisattaṃ āgantvā mahānasaṃ pavisantaṃ disvā imaṃ pārāvataṃ nissāya maṃsaṃ labhissāmīti punadivase pātova āgantvā bodhisattassa nikkhamitvā gocaragahaṇatthāya gamanakāle piṭṭhito piṭṭhito agamāsi. Atha naṃ bodhisatto kasmā tvaṃ samma amhehi saddhiṃ carasīti āha. Sāmi tumhākaṃ kiriyā mayhaṃ ruccati ito paṭṭhāya tumhe upaṭṭhahissāmīti. Samma tumhe aññagocarā mayaṃ aññagocarā tumhehi tumhākaṃ upaṭṭhānaṃ dukkaranti. Sāmi tumhākaṃ gocaraṃ gatakāle ahampi gocaraṃ gahetvā tumhehi saddhiṃyeva gamissāmīti. Sādhu kevalaṃ te appamattakena bhavitabbanti evaṃ Bodhisatto kākaṃ ovaditvā gocare caranto tiṇabījādīni khādati. Bodhisattassa pana gocaragahaṇakāle kāko gantvā gomayapiṇḍaṃ apanetvā pāṇake khāditvā udaraṃ pūretvā bodhisastassa santikaṃ āgantvā sāmi tumhe ativelaṃ caratha atibahubhakkhena nāma bhavituṃ na vaṭṭatīti vatvā bodhisattena gocaraṃ gahetvā sāyaṃ āgacchantena saddhiṃyeva mahānasaṃ pāvisi. Bhattakārako amhākaṃ kapoto aññaṃpi gahetvā āgatoti vatvā kākassāpi pacchiṃ ṭhapesi. Tato paṭṭhāya dve janā vasanti.