4 Kāmajātakaṃ.

Kāmaṃ kāmayamānassāti idaṃ satthā jetavane viharanto aññataraṃ brāhmaṇaṃ ārabbha kathesi.

Eko kira sāvatthivāsī brāhmaṇo aciravatitīre khettakaraṇatthāya araññaṃ koṭesi. Satthā tassa upanissayaṃ disvā sāvatthiyaṃ piṇḍāya pavisanto maggā okkamma tena saddhiṃ paṭisanthāraṃ katvā kiṃ karosi brāhmaṇāti vatvā khettaṭṭhānaṃ koṭāpesiṃ bho gotamāti vutte sādhu brāhmaṇakammaṃ karohīti vatvā agamāsi. Etenevupāyena chinnarukkhe hāretvā khettassa sodhanakāle kedārabandhanakāle vapanakāleti punappunaṃ gantvā tena saddhiṃ paṭisanthāraṃ akāsi. Punadivase so brāhmaṇo ajja bho gotama mayhaṃ vappamaṅgalaṃ ahaṃ imasmiṃ sasse nipphanne buddhappamukhassa bhikkhusaṅghassa mahādānaṃ dassāmīti āha. Satthā tuṇhībhāvena adhivāsetvā pakkāmi. Punekadivasaṃ brāhmaṇo sassaṃ olokento aṭṭhāsi. Satthā tattha kiṃ karosi brāhmaṇāti pucchitvā sassaṃ olokemi bho gotamāti vutte sādhu brāhmaṇāti vatvā pakkāmi. Tadā brāhmaṇo cintesi samaṇo gotamo abhiṇhaṃ āgacchati nissaṃsayaṃ bhattena atthiko dassāmissa bhattanti. Tassevaṃ cintetvā gehaṃ gatadivase satthāpi tattha Agamāsi. Atha brāhmaṇassa ativiya vissāso uppajji. Athāparabhāge pariṇate sasse sve khettaṃ lāyissāmīti sanniṭṭhānaṃ katvā nipanne brāhmaṇe aciravatiyā upari sabbarattiṃ ghanakaravassaṃ vassi. Mahogho āgantvā ekanālimattaṃpi asesetvā sabbaṃ sassaṃ samuddaṃ pavesesi. Brāhmaṇo oghamhi osarite sassavināsaṃ oloketvā sakabhāvena saṇṭhāretuṃ nāsakkhi balavasokābhibhūto hatthena uraṃ paharitvā paridevamāno gehaṃ gantvā vilapanto nipajji. Satthā paccūsasamaye sokābhibhūtaṃ brāhmaṇaṃ disvā brāhmaṇassa avassayo bhavissāmīti punadivase sāvatthiyaṃ piṇḍāya caritvā pacchābhattaṃ piṇḍapātapaṭikkanto bhikkhū vihāraṃ pesetvā pacchāsamaṇena saddhiṃ tassa gehadvāraṃ agamāsi. Brāhmaṇo satthu āgatabhāvaṃ sutvā paṭisanthāratthāya me sahāyo āgato bhavissatīti laddhassāso āsanaṃ paññāpesi. Satthā pavisitvā paññattāsane nisīdi brāhmaṇa kasmā dubbaṇṇosi kinte aphāsukanti pucchi. Bho gotama aciravatitīre mayā rukkhacchedato paṭṭhāya kataṃ kammaṃ tumhe jānātha ahaṃ imasmiṃ sasse nipphanne tumhākaṃ dānaṃ dassāmīti vakkhāmi idāni me sabbantaṃ sassaṃ mahogho samuddameva pavesesi taṃ kiñci avasiṭṭhaṃ natthi sakaṭasatamattaṃ dhaññaṃ vinaṭṭhaṃ tena me mahāsoko uppannoti. Kiṃ pana brāhmaṇa socantassa naṭṭhaṃ punāgacchatīti. Nohetaṃ bho gotamāti. Evaṃ santepi kasmā socasi imesaṃ sattānaṃ dhanadhaññaṃnāma uppajjanakāle Uppajjati nassanakāle nassati kiñci saṅkhāragataṃ anassanadhammaṃnāma natthi mā cintayīti. Iti naṃ satthā samassāsetvā tassa sappāyadhammaṃ desento kāmasuttaṃ kathesi. Sutte pariyosānaṃ gacchante brāhmaṇo sotāpattiphale patiṭṭhahi. Satthā taṃ nissokaṃ katvā uṭṭhāyāsanā vihāraṃ agamāsi. Satthā asukaṃnāma brāhmaṇaṃ sokasallasamappitaṃ nissokaṃ katvā sotāpattiphale patiṭṭhāpesīti sakalanagaraṃ aññāsi. Bhikkhū dhammasabhāyaṃ kathaṃ samuṭṭhāpesuṃ āvuso dasabalo brāhmaṇena saddhiṃ mettiṃ katvā vissāsiko hutvā upāyeneva tassa sokasamappitassa dhammaṃ desetvā taṃ nissokaṃ katvā sotāpattiphale patiṭṭhāpesīti. Satthā āgantvā kāyanuttha bhikkhave etarahi kathāya sannisinnāti pucchitvā imāyanāmāti vutte na bhikkhave idāneva pubbepāhaṃ etaṃ nissokamakāsinti vatvā atītaṃ āhari