Pakiṇṇakanipātavaṇṇanā

1. Sālikedārajātakaṃ.

Sampannaṃ sālikedāranti idaṃ satthā jetavane viharanto mātuposakabhikkhuṃ ārabbha kathesi. Vatthu pana sāmajātake āvībhavissati.

Satthā pana taṃ bhikkhuṃ pakkosāpetvā saccaṃ kira tvaṃ bhikkhu gīhī posesīti pucchitvā saccaṃ bhanteti kinte hontīti mātāpitaro me bhanteti vutte sādhu bhikkhu porāṇakapaṇḍitāpi tiracchānā hutvā sakuṇayoniyaṃ nibbattitvā jiṇṇe mātāpitaro kulāvake nipajjāpetvā mukhatuṇḍena gocaraṃ āharitvā posesunti vatvā atītaṃ āhari