6. Surucijātakaṃ.

Mahesī rucino bhariyāti idaṃ satthā sāvatthiyaṃ upanissāya pubbārāme migāramātu pāsāde viharanto visākhāya mahāupāsikāya laddhe aṭṭha vare ārabbha kathesi.

Sā hi ekadivasaṃ jetavane dhammakathaṃ sutvā bhagavantaṃ saddhiṃ bhikkhusaṅghehi svātanāya nimantetvā pakkāmi. Tassā pana rattiyā accayena cātuddīpiko mahāmegho vassi. Bhagavā bhikkhū Āmantetvā yathā bhikkhave jetavane vassati evaṃ catūsu dīpesu vassati ovassāpetha bhikkhave kāyaṃ pacchimako mahāmeghoti vatvā ovassāpitakāle bhikkhūhi saddhiṃ iddhibalena jetavane antarahito visākhāya koṭṭhake pāturahosi. Upāsikā acchiriyaṃ vata bho abbhūtaṃ vata bho tathāgatassa mahiddhitā mahānubhāvatā yatra hi nāma jaṇṇumattesupi oghesu vattamānesu kaṭimattesupi oghesu vattamānesu na hi nāma ekabhikkhussāpi pādā vā cīvarāni vā allāni bhavissantīti tuṭṭhahaṭṭhā udaggā buddhappamukhaṃ bhikkhusaṅghaṃ parivīsitvā katabhattakaccaṃ bhagavantaṃ etadavoca aṭṭhāhaṃ bhante bhagavantaṃ varāni yācāmīti. Atikkantavarā kho visākhe tathāgatāti. Yāni ca bhante vo kappiyāni yāni ca anavajjāni tāni varāni bhante ahaṃ yācāmīti āha. Vadehi visākheti. Icchāmihaṃ bhante bhikkhusaṅghassa yāvajīvaṃ vassikasāṭikaṃ dātuṃ āgantukabhattaṃ dātuṃ gamikabhattaṃ dātuṃ gilānabhattaṃ dātuṃ gilānupaṭṭhākabhattaṃ dātaṃ gilānabhesajjaṃ dātuṃ dhuvayāguṃ dātuṃ bhikkhunīsaṅghassa udakasāṭakaṃ dātunti. Satthā pana kiṃ visākhe tvaṃ atthavasaṃ sampassamānā tathāgataṃ aṭṭha varāni yācasīti pucchitvā tāya aṭṭhavarānisaṃse kathite sādhu sādhu visākhe imānisaṃse sampassamānā tathāgataṃ aṭṭha varāni yācasīti vatvā anujānāmi te visākhe aṭṭha varānīti aṭṭha vare datvā anumodanaṃ katvā pakkāmi. Athekadivasaṃ satthari pubbārāme viharante bhikkhū dhammasabhāyaṃ kathaṃ samuṭṭhāpesuṃ Āvuso visākhā mahāupāsikā mātugāmattabhāve ṭhatvāpi dasabalassa santikā aṭṭha vare labhi aho mahāguṇāti. Satthā āgantvā kāyanuttha bhikkhave etarahi kathāya sannisinnāti pucchitvā imāyanāmāti vutte na bhikkhave idāneva visākhā mama santike vare labhati pubbepi labhiyevāti vatvā atītaṃ āhari