8. Vedabbajātakaṃ

anupāyena yo atthanti idaṃ satthā jetavane viharanto dubbacabhikkhuṃ ārabbha kathesi.

Tañhi bhikkhuṃ satthā na tvaṃ bhikkhu idāneva dubbaco pubbepi dubbacoyeva teneva kāraṇena paṇḍitānaṃ vacanaṃ akatvā tiṇhena asinā dvidhā katvā chinno hutvā magge nipatittha tañca ekakaṃ nissāya purisasahassaṃ jīvitakkhayaṃ pattanti vatvā atītaṃ āhari.

Atīte bārāṇasiyaṃ brahmadatte rajjaṃ kārente ekasmiṃ gāmake aññataro brāhmaṇo vedabbaṃ nāma mantaṃ jānāti. So kira manto anaggho mahāraho nakkhattayoge laddhe taṃ mantaṃ parivattetvā ākāse olokite ākāsato sattaratanavassaṃ vassi. Tadā bodhisatto tassa brāhmaṇassa santike sippaṃ uggaṇhāti. Athekadivasaṃ brāhmaṇo bodhisattaṃ ādāya kenacideva karaṇīyena attano gāmā nikkhamitvā cetiraṭṭhaṃ agamāsi. Antarāmagge ca ekasmiṃ araññaṭṭhāne pañcasatā pesanakacorā nāma panthaghātaṃ karonti. Te bodhisattañca vedabbabrāhmaṇañca gaṇhiṃsu. Kasmā panete pesanakacorāti vuccanti. Te kira dve jane gahetvā ekaṃ dhanāharaṇatthāya pesenti tasmā pesanakacorātveva vuccanti. Tepi ca ekasmiṃ araññaṭṭhāne ṭhitā pitāputte gahetvā pitaraṃ tvaṃ amhākaṃ dhanaṃ āharitvā puttaṃ gahetvā yāhīti vadanti. Etenupāyena mātādhītaro Gahetvā mātaraṃ vissajjenti jeṭṭhakakaniṭṭhe gahetvā jeṭṭhakabhātikaṃ vissajjenti ācariyantevāsike gahetvā antevāsikaṃ vissajjenti.