9. Tacchakasukarajātakaṃ.

Yadesamānā vicarimhāti idaṃ satthā jetavane viharanto dve mahallakatthere ārabbha kathesi.

Mahākosallo kira bimbisārassa dhītaraṃ dento dhītu nhānīyamūlatthāya kāsikagāmaṃ adāsi. Pasenadirājā ajātasattunā pitari mārite taṃ gāmaṃ acchindi. Tesu tassatthāya yujjhantesu paṭhamaṃ ajātasattussa jayo ahosi. Kosalarājā parājayaṃ patto amacce pucchi kena nukho upāyena ajātasattuṃ gaṇheyyāmāti. Mahārāja bhikkhūnāma mantakusalā honti cārapurise pesetvā bhikkhūnaṃ kathaṃ pariggaṇhituṃ vaṭṭatīti. Rājā sādhūti paṭisuṇitvā etha tumhe vihāraṃ gantvā paṭicchannā hutvā bhadantānaṃ kathaṃ pariggaṇhathāti purise payojesi. Jetavanepi bahū rājapurisā pabbajitā honti. Tesu dve mahallakattherā vihārapaccante paṇṇasālāya vasanti eko dhanuggahatissattheronāma eko mantadattattheronāma. Te sabbarattiṃ supitvā paccūsakāle pabujjhiṃsu. Tesu dhanuggahatissatthero aggiṃ jāletvā āha bhante mantadattattherāti. Kiṃ bhanteti. Niddāyatha tumheti. Na niddāyāma kiṃ kātabbanti. Bhante bālako vatāyaṃ pasenadikosalarājā pātīmattabhojanameva paribhuñjituṃ jānātīti. Atha kiṃ bhanteti. Attano kucchimhi pāṇakamattena ajātasattunā parājito rājāti. Kiṃ pana bhante kātuṃ vaṭṭatīti. Bhante Mantadattatthera yuddhaṃnāma sakaṭabyuhacakkabyuhapadumabyuhādivasena tividhaṃ tesu bhāgineyyaṃ ajātasattuṃ gaṇhantena sakaṭabyuhaṃ katvā gaṇhituṃ vaṭṭatīti asukaṃnāma asukaṃnāma pabbatkhaṇḍaṃ dvīsu passesu purise ṭhapetvā purato balaṃ dassetvā anto paviṭṭhabhāvaṃ ñatvā naditvā vaggitvā kumine paviṭṭhamacchaṃviya antomuṭṭhiyaṃ katvā gahetuṃ sakkāti. Payojitapurisā taṃ kathaṃ sutvā gantvā rañño ārocesuṃ. Rājā mahatiyā senāya gantvā tathā katvā ajātasattuṃ gahetvā saṅkhalikabandhanena bandhitvā katipāhaṃ nimmadaṃ katvā puna evarūpaṃ mā karīti assāsetvā mocetvā dhītaraṃ vajirakumāriṃnāma tassa datvā mahantena parivārena visajjesi. Kosalaraññā dhanuggahatissattherassa saṃvidhānena ajātasattu gahitoti bhikkhūnaṃ antare kathā samuṭṭhahi. Dhammasabhāyaṃ tameva kathaṃ samuṭṭhāpesuṃ. Satthā āgantvā kāyanuttha bhikkhave etarahi kathāya sannisinnāti pucchitvā imāyanāmāti vutte na bhikkhave idāneva pubbepi dhanuggahatissatthero yuddhasaṃvidhāne chekoti vatvā atītaṃ āhari