Sarabhaṅgajātakaṃ

alaṅkatā kuṇḍalino suvatthāti idaṃ satthā jetavane viharanto mahāmoggallānattherassa parinibbānaṃ ārabbha kathesi.

Sārīputtatthero kira tathāgataṃ jetavane viharantaṃ parinibbānaṃ anujānāpetvā gantvā nālandagāmake jātovarake parinibbāyi. Tassa parinibbutabhāvaṃ sutvā satthā rājagahaṃ gantvā veḷuvane vihāsi. Tadā mahāmoggallānatthero isigilipasse kāḷasilāyaṃ Viharati. So pana iddhibalena koṭippattabhāvena devacārikañca ussadacārikañca carati. Devaloke buddhasāvakānaṃ mahantaṃ issariyaṃ disvā ussadanirayesu ca titthiyasāvakānaṃ mahantaṃ dukkhaṃ disvā manussalokaṃ āgantvā asuko upāsako asukā ca upāsikā asukasmiṃ nāma devaloke nibbattitvā mahāsampattiṃ anubhavanti titthiyasāvako asuko ca asuko ca nirayādīsu asuke apāye nāma nibbattoti manussānaṃ kathesi. Manussā sāsane pasīdanti titthiye parivajjanti. Buddhasāvakānaṃ sakkāro mahanto ahosi. Titthiyānaṃ sakkāro parihāyati. Te there āghāṭaṃ bandhitvā imasmiṃ jīvante amhākaṃ upaṭṭhākā bhijjanti sakkāro ca parihāyati. Māressāma nanti. Therassa māraṇatthaṃ samaṇakuttassa nāma corassa sahassaṃ adaṃsu. So theraṃ māressāmīti mahantena parivārena saddhiṃ kāḷasilāyaṃ agamāsi. Thero taṃ āgacchantaṃ disvāva iddhiyā uppatitvā pakkāmi. Coro taṃ divasaṃ theraṃ disvā nivattetvā punadivasepi punadivasepīti cha divase agamāsi. Theropi tatheva iddhiyā pakkāmi. Sattame pana divase therassa pubbe kataṃ aparāparavedanīyakammaṃ okāsaṃ labhati. So kira pubbe bhariyāya vacanaṃ gahetvā mātāpitaro māretukāmo yānakena araññaṃ netvā corānaṃ uṭṭhitākāraṃ katvā mātāpitaro potheti paharati ca. Te cakkhudubbalatāya rūpadassanarahitā taṃ attano puttaṃ asañjānantā corā eteti saññāya tāta asukā nāma corā no ghāṭenti tvaṃ Paṭikkamāhīti tassevatthāya parideviṃsu. So cintesi ime mayā pothiyamānāpi mayhaṃyevatthāya paridevanti ayuttaṃ kammaṃ karomīti. Atha ne assāsetvā corānaṃ palāyanākāraṃ dassetvā tesaṃ hatthapāde sambāhetvā ammatātā mā bhāyittha corā palātāti vatvā puna attano gehameva ānesi.