3. Takkajātakaṃ

kodhanā akataññū cāti idaṃ satthā jetavane viharanto ukkaṇṭhitabhikkhuññeva ārabbha kathesi.

Satthā saccaṃ kira tvaṃ bhikkhu ukkaṇṭhitosīti pucchitvā saccanti vutte itthiyo nāma akataññū mittadubbhā kasmā tā nissāya Ukkaṇṭhitosīti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto isipabbajjaṃ pabbajitvā gaṅgāya tīre assamaṃ māpetvā samāpattiyo ca abhiññā ca nibbattetvā jhānaratisukhena vihāsi. Tasmiṃ samaye bārāṇasīseṭṭhidhītā duṭṭhakumārī nāma caṇḍā ahosi pharusā dāsakammakare akkosati paharati. Atha naṃ ekadivasaṃ parivāramanussā gahetvā gaṅgāya kīḷissāmāti agamaṃsu. Tesaṃ kīḷantānaṃyeva suriyaṭṭhaṅgamanavelā jātā megho uṭṭhahi. Manussā meghaṃ disvā ito cito ca vegena palāyiṃsu. Seṭṭhidhītāya dāsakammakarā ajja amhehi etissā piṭṭhiṃ passituṃ vaṭṭatīti taṃ antoudakasmiññeva chaḍḍetvā uttariṃsu. Devo pāvassi. Suriyopi aṭṭhaṅgato. Andhakāraṃ jātaṃ. Te tāya vināva gehaṃ gantvā kahaṃ sāti vutte gaṅgāto tāva uttiṇṇā aka naṃ na jānāma kahaṃ gatāti. Ñātakā vicinitvāpi na passiṃsu. Sā mahāviravaṃ viravantī udakena vuyhamānā aḍḍharattikasamaye bodhisattassa paṇṇasālāya samīpaṃ pāpuṇi. So tassā saddaṃ sutvā mātugāmassa saddo esa parittāṇamassā karissāmīti tiṇukkaṃ ādāya nadītīraṃ gantvā taṃ disvā mā bhāyi mā bhāyīti assāsetvā nāgabalo thāmasampanno nadiṃ taramāno gantvā taṃ ukkhipitvā assamapadaṃ ānetvā aggiṃ katvā adāsi sīte vigate madhurāni phalāphalāni upanāmesi tāni khāditvā ṭhitaṃ kattha vāsikā Kathañca gaṅgāya patitāsīti pucchi. Sā taṃ pavuttiṃ ārocesi. Atha naṃ tvaṃ ettheva vasāti paṇṇasālāya vasāpento dvīhatīhaṃ sayaṃ abbhokāse vasitvā idāni gacchāti āha. Sā imaṃ tāpasaṃ sīlabhedaṃ pāpetvā gahetvā gamissāmīti na gacchati. Atha gacchante kāle itthīkuttaṃ itthīlīḷhaṃ dassetvā tassa sīlabhedaṃ katvā jhānaṃ antaradhāpesi. So taṃ gahetvā araññeyeva vasati. Atha naṃ sā āha ayya kinno araññavāsena manussapathaṃ gamissāmāti. So taṃ ādāya ekaṃ paccantagāmaṃ gantvā takkabhatiyā jīvitaṃ kappetvā taṃ poseti. Tassa takkaṃ vikkiṇitvā jīvatīti takkapaṇḍitoti nāmaṃ akaṃsu. Athassa gāmavāsino paribbayaṃ datvā amhākaṃ suyuttaṃ duyyuttaṃ vā ācikkhanto ettha vasāti gāmadvāre kuṭiyaṃ vāsesuṃ.