3. Saccaṃkirajātakaṃ

saccaṃ kirevamāhaṃsūti idaṃ satthā veḷuvane viharanto vadhāya parisakkanaṃ ārabbha kathesi. Bhikkhusaṅghe hi dhammasabhāyaṃ nisīditvā āvuso devadatto satthu guṇaṃ na jānāti vadhāya parisakkatīti devadattassa aguṇaṃ kathente satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva devadatto mayhaṃ vadhāya parisakkati pubbepi parisakkiyevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente tassa duṭṭhakumāro nāma putto ahosi kakkhaḷo pharuso pahaṭāsīvisūpamo anakkositvā vā appaharitvā vā kenaci saddhiṃ na kathesi. So antojanassa ca bahijanassa ca akkhimhi patitarajaṃ viya khādituṃ āgatapisāco viya ca amanāpo ahosi ubbejanīyo. So ekadivasaṃ nadīkīḷaṃ kīḷitukāmo mahantena parivārena nadītīraṃ agamāsi. Tasmiṃ khaṇe mahāmegho uṭṭhahi disā andhakārā jātā. So dāsapessajanaṃ āha etha bhaṇe maṃ gahetvā nadīmajjhaṃ netvā nhāpetvā ānethāti. Te taṃ tattha netvā kinno rājā karissati imaṃ pāpapurisaṃ ettheva māremāti mantayitvā ettha gaccha kāḷakaṇṇīti udake opilāpetvā paccuttaritvā tīre aṭṭhaṃsu. Kahaṃ kumāroti Vutte na mayaṃ kumāraṃ passāma meghaṃ uṭṭhitaṃ disvā udake nimujjitvā purato āgato bhavissatīti amaccā rañño santikaṃ agamaṃsu. Rājā kahaṃ me puttoti pucchi. Na jānāma deva meghe uṭṭhite purato āgato bhavissatīti saññāyāgatamhāti. Rājā dvāraṃ vivarāpetvā nadītīraṃ gantvā vicinathāti tattha tattha vicināpesi. Koci kumāraṃ nāddasa. Sopi kho meghandhakāre deve vassante nadiyā vuyhamāno ekaṃ dārukkhandhaṃ disvā tattha nisīditvā maraṇabhayatajjito paridevamāno gacchati.

Tasmiṃ pana kāle bārāṇasīvāsī eko seṭṭhī nadītīre cattāḷīsakoṭidhanaṃ nidahitvā dhanataṇhāya dhanapiṭṭhe sappo hutvā nibbatti. Aparopi tasmiṃyeva padese tiṃsakoṭiyo nidahitvā dhanataṇhāya tattheva unduro hutvā nibbatti. Tesaṃ vasanaṭṭhānaṃ udakaṃ pāvisi. Te udakassa paviṭṭhamaggeneva nikkhamitvā sotaṃ chindantā gantvā taṃ rājakumārena abhinisinnaṃ rukkhakkhandhaṃ patvā eko ekaṃ koṭiṃ itaro itaraṃ āruyha khandhapiṭṭheyeva nipajjiṃsu. Tassāyeva kho pana nadiyā tīre eko simbalirukkho atthi. Tattheko suvapotako vasati. Sopi rukkho udakena dhotamūlo nadīpiṭṭhe pati. Suvapotako deve vassante uppatitvā gantuṃ asakkonto gantvā tasseva khandhassa ekapasse nilīyi. Evaṃ te cattāro janā ekato vuyhamānā gacchanti.