3 Cullapadumajātakaṃ

ayameva sā ahampi so anaññoti idaṃ satthā jetavane viharanto ukkaṇṭhitabhikkhuṃ ārabbha kathesi.

Vatthu ummādantijātake āvibhavissati.

So pana bhikkhu satthārā saccaṃ kira tvaṃ ukkaṇṭhitoti vutte saccaṃ bhagavāti vatvā ko pana taṃ ukkaṇṭhāpetīti vutte ahaṃ bhante ekaṃ alaṅkatapaṭiyattaṃ mātugāmaṃ disvā kilesānuvattiko hutvā ukkaṇṭhitoti āha. Atha naṃ satthā bhikkhu mātugāmo nāma akataññū mittadubbhī thaddhahadayo, porāṇakapaṇḍitāpi attano dakkhiṇajannukalohitaṃ pāyetvā yāvajīvitaṃ dānampi datvā mātugāmassa cittaṃ na labhiṃsūti vatvā atītaṃ āhari.