Tattha dhīrāti dhitimāti dhīrā vigatapāpāti dhīrā, atha vā dhī vuccati paññā, tāya paññāya samannāgatāti dhīrā, buddhā paccekabuddhā buddhasāvakā bodhisattā ca ime dhīrā nāma. Yadāyasanti ādīsu yaṃ saṅkhalikasaṅkhātaṃ ayasā nibbattaṃ ayasaṃ andubandhanasaṅkhātaṃ dārujaṃ yañca pabbajatiṇehi vā aññehi vā vākādīhi rajjuṃ katvā kataṃ rajjubandhanaṃ taṃ dhīrā daḷhaṃ thiranti nāhu na kathenti. Sārattarattāti sārattā hutvā rattā bahalarāgarattāti attho. Maṇikuṇḍalesūti maṇīsu ca kuṇḍalesu ca maṇiyuttesu vā kuṇḍalesu. Etaṃ daḷhanti ye ca maṇikuṇḍalesu sārattarattā tesaṃ yeva yo sārāgo yā ca tesaṃ puttadāresu apekkhā taṇhā etaṃ kilesamayaṃ bandhanaṃ daḷhaṃ thiranti dhīrā āhu. Ohārinanti ākaḍḍhitvā catūsu apāyesu pātanato avaharati heṭṭhā heṭṭhā haratīti ohārinaṃ. Sithilanti bandhanaṭṭhānesu chavicammamaṃsāni na chindati lohitaṃ na nīharati Bandhanabhāvampi na jānāpetvā thalapathajalapathādīsu kammāni kātuṃ detīti sithilaṃ. Duppamuñcanti taṇhālobhavasena hi ekavārampi uppannaṃ kilesabandhanaṃ bandhanaṭṭhānato kacchapo viya dummocayaṃ hotīti duppamuñcaṃ. Etampi chetvānāti etaṃ evaṃ daḷhampi kilesabandhanaṃ ñāṇakhaggena chinditvā ayadāmāni chetvā mattavaravāraṇo viya pañjare bhinditvā sīhapotako viya dhīrā vatthukāmakilesakāme ukkārabhūmiyaṃ viya jigucchamānā anapekkhino hutvā kāmasukhaṃ pahāya vajanti pakkamanti pakkamitvā ca pana himavantaṃ pavisitvā isipabbajjaṃ pabbajitvā jhānasukhena vītināmentīti attho.

Evaṃ bodhisatto imaṃ udānaṃ udānetvā aparihīnajjhāno brahmalokapārāyano ahosi.

Satthā imaṃ dhammadesanaṃ āharitvā saccāni pakāsesi. Saccapariyosāne keci sotāpannā keci sakidāgāmino keci anāgāmino keci arahantā ahesuṃ. Tadā mātā mahāmāyā ahosi, pitā suddhodanamahārājā, bhariyā rāhulamātā, putto rāhulo, puttadāraṃ pahāya nikkhamitvā pabbajitapuriso pana ahamevāti.

Bandhanāgārajātakaṃ paṭhamaṃ.