Tattha pamāṇakarānaṃ kilesānaṃ abhāvena guṇānañca pamāṇābhāvena buddharatanaṃ appamāṇaṃ. Dhammoti navavidho lokuttaradhammo tassāpi pamāṇaṃ nāma kātuṃ na sakkāti appamāṇo. Tena appamāṇena dhammena samannāgatattā saṅghopi appamāṇo.

Iti bodhisatto imesaṃ tiṇṇaṃ ratanānaṃ guṇe anussarethāti

Vatvā tiṇṇaṃ ratanānaṃ appamāṇaguṇataṃ dassetvā sappamāṇe satte dassetuṃ pamāṇavantāni siriṃsapāni ahi vicchikā satapadī uṇṇānābhī sarabū mūsikāti āha.

Tattha siriṃsapānīti sabbadīghajātikānaṃ nāmaṃ. Te hi sarantā gacchanti, sirena vā sapantīti siriṃsapā. Ahītiādi tesaṃ sarūpato nidassanaṃ. Tattha uṇṇānābhīti makkaṭako. Tassa hi nābhito uṇṇāsadisaṃ suttaṃ nikkhamati tasmā uṇṇānābhīti vuccati. Sarabūti gharagolikā.