iṅgha vaddhamayaṃ pāsaṃ chinda dantehi kacchapa,
ahaṃ tathā karissāmi yathā nehīti luddakoti.
Kacchapo cammavarattaṃ khādituṃ ārabhi. Satapatto luddassa vasanagāmato avidūre rukkhe nisīdi. Luddo paccūsakāle yeva sattiṃ gahetvā nikkhami. Sakuṇo tassa nikkhamanabhāvaṃ ñatvā vassitvā pakkhe pappoṭhetvā taṃ purimadvārena nikkhamantaṃ mukhena pahari. Luddako kāḷakaṇṇinā sakuṇenamhi pahatoti nivattitvā thokaṃ sayitvā puna sattiṃ gahetvā uṭṭhāsi. Sakuṇo ayaṃ paṭhamaṃ purimadvārena nikkhamitvā idāni pacchimadvārena nikkhamissatīti ñatvā gantvā pacchimagehe nisīdi. Luddopi purimadvārena me nikkhamante kāḷakaṇṇisakuṇo diṭṭho, idāni pacchimadvārena nikkhamissāmīti pacchimadvārena nikkhami. Sakuṇo puna vassitvā gantvā mukhena pahari. Luddo punapi kāḷakaṇṇisakuṇena pahato, na dāni me Esa nikkhamituṃ detīti nivattitvā yāva aruṇuggamanā sayitvā aruṇuggamanavelāya sattiṃ gahetvā nikkhami. Sakuṇo vegena gantvā luddo āgacchatīti bodhisattassa kathesi. Tasmiṃ khaṇe kacchapena ekameva vaṭṭaṃ ṭhapetvā sesā vaṭṭā khāditā honti. Dantā panassa pathanākārappattā jātā, mukhaṃ lohitamakkhitaṃ. Bodhisatto luddaputtaṃ sattiṃ gahetvā asanivegena āgacchantaṃ disvā taṃ vaṭṭaṃ chindetvā vanaṃ pāvisi. Sakuṇo rukkhagge nisīdi. Kacchapo pana dubbalattā tattheva nipajji. Luddo kacchapaṃ passitvā pasibbake pakkhipitvā ekasmiṃ khānuke laggesi. Bodhisatto nivattitvā olokento kacchapassa gahitabhāvaṃ ñatvā sahāyassa jīvitadānaṃ dassāmīti dubbalo viya hutvā luddassa attānaṃ dassesi. So dubbalo esa bhavissati, māressāmi nanti sattiṃ ādāya anubandhi. Bodhisatto nātidūre nāccāsanne gacchanto taṃ ādāya araññaṃ pāvisi. Dūraṃ gatabhāvaṃ ñatvā padaṃ vañcetvā aññena maggena vātavegena gantvā siṅgena pasibbakaṃ ukkhipitvā bhūmiyaṃ pātetvā phāletvā kacchapaṃ nīhari. Atha satapattopi rukkhā otari. Bodhisatto dvinnampi ovādaṃ dadamāno ahaṃ tumhe nilsāya jīvitaṃ labhiṃ, tumhehipi sahāyassa kattabbaṃ mayhaṃ kataṃ, idāni luddo āgantvā tumhe gaṇheyya, tasmā samma satapatta tvaṃ attano puttake gahetvā aññattha yāhi, tvampi samma kacchapa udakaṃ pavisāti