Tattha avadhi vatāti ghāṭesi vata. Pabyāharanti byāharanto. Suggahitasmiṃ kaṭṭhasminti mukhena suṭṭhu ḍaṃsitvā gahite daṇḍake. Vācāya sakiyā vadhīti atimukharatāya akāle vācaṃ nicchārento daṭṭhaṭṭhānaṃ vissajjetvā tāya sakāya vācāya attānaṃ vadhi ghāṭesi, evameva jīvitakkhayaṃ patto na aññathāti. Etampi disvāti etampi kāraṇaṃ disvā. Naravīraseṭṭhāti naresu viriyena seṭṭha uttamaviriya rājavara. Vācaṃ pamuñce kusalaṃ nātivelanti saccādipaṭisaṃyuttaṃ kusalameva paṇḍitapuriso muñceyya nicchāreyya, tampi hitaṃ kālayuttaṃ na ativelaṃ atikkantakālaṃ apariyantavācaṃ bhāseyya. Passasīti nanu paccakkhato passasi. Bahubhāṇenāti bahubhāṇanena. Kacchapaṃ byasanaṃ Gatanti evaṃ kacchapaṃ jīvitakkhayaṃ pattanti.

Rājā maṃ sandhāya bhāsatīti ñatvā amhe sandhāya kathesi paṇḍitāti āha. Bodhisatto mahārāja tvaṃ vā hotu añño vā yo koci pamāṇātikkantaṃ bhāsento evarūpaṃ byasanaṃ pāpuṇātīti pākaṭaṃ katvā kathesi. Rājā tato paṭṭhāya viramitvā mandabhāṇī ahosi.

Satthā imaṃ dhammadesanaṃ āharitvā jātakaṃ samodhānesi. Tadā kacchapo kokāliko ahosi, dve haṃsapotakā dve mahātherā, rājā ānando, amaccapaṇḍito pana ahamevāti.

Kacchapajātakaṃ pañcamaṃ.