kīto dhanena bahunā so taṃ vitudate jananti.

Tattha hiraññaṃ me suvaṇṇaṃ meti desanāsīsamattametaṃ. Iminā pana padadvayena dasavidhampi ratanaṃ sabbaṃ pubbaṇṇāparaṇṇaṃ khettaṃ vatthuṃ dvippadacatuppadañca sabbaṃ dassetvā idaṃ me idaṃ meti āha. Esā rattidivā kathāti esā manussānaṃ rattiṃ ca divā ca niccakālaṃ kathā. Aññaṃ pana te pañcakkhandhā aniccāti vā hutvā na bhavantīti vā na jānanti evameva paridevantā vicaranti. Dummedhānanti appaññānaṃ. Ariyadhammaṃ apassatanti ariyānaṃ buddhādīnaṃ dhammaṃ ariyaṃ vā niddosaṃ navavidhaṃ lokuttaradhammaṃ apassantānaṃ esā va kathā, aññā pana aniccaṃ vā dukkhaṃ vāti tesaṃ kathā nāma natthi. Gahapatayoti gehe adhipatibhūtā. Eko Tatthāti tesu dvīsu gharasāmikesu ekoti mātugāmaṃ sandhāya vadati tattha. Veṇikatoti kataveṇi nānappakārena saṇṭhāpitakesakalāpoti attho. Atho aṅkitakaṇṇakoti atha sveva viddhakaṇṇo chiddakaṇṇoti lambakaṇṇataṃ sandhāyāha. Kīto dhanena bahunāti so panesa amassuko lambatthano veṇikato aṅkitakaṇṇo mātāpitūnaṃ bahudhanaṃ datvā kīto maṇḍitvā pasādhetvā yānaṃ āropetvā gahetvā mahantena parivārena gharaṃ ānīto. So taṃ vitudate jananti so gahapati āgatakālato paṭṭhāya tasmiṃ gehe dāsakammakarādigehajanaṃ are duṭṭhadāsa duṭṭhadāsi idaṃ karosi idaṃ na karosīti mukhasattīhi vitudati sāmiko viya hutvā mahājanaṃ vicāresi. Evaṃ tāva manussalokaṃ ativiya ayuttanti manussalokaṃ garahati.

Taṃ sutvā sabbe vānarā mā kathetha, asotabbayuttakaṃ assumhāti ubhohi hatthehi kaṇṇe daḷhaṃ pidahiṃsu. Imasmiṃ ṭhāne amhehi idaṃ ayuttaṃ sutanti taṃ ṭhānampi garahitvā aññattha agamaṃsu. So piṭṭhipāsāṇo garahitapiṭṭhipāsāṇo yeva kira nāma jāto.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne so bhikkhu sotāpattiphale patiṭṭhahi. Tadā vānaragaṇā buddhaparisā ahesuṃ, vānarindo pana ahamevāti.